WILLEMSTAD – 20 di novèmber 2023 – Pabien Kòrsou! E dia tan antisipá a yega. Pa promé biaha den historia, Kòrsou a surpasá mei mion turista di estadia. Aña 2023, sin duda a demostrá di ta un bon aña pa turismo di Kòrsou. Ta e aña den kual Kòrsou a kibra diferente rèkòrt den kantidat di turista di estadia for di diferente di nos merkadonan prinsipal manera entre otro Estádos Unídos, Brazil, Canada, Colombia i awe nos a kibra e rèkòrt di mas grandi alkansando riba 500 mil turista di estadia. Ofisina di Turismo di Kòrsou (CTB) ta raportá ku di yanüari 2023 te na e momentunan aki den luna di novèmber, un total di 501.313 turista di estadia a bishitá nos pais. Na aña 2022, Kòrsou a risibí un total di 489.558 turista di estadia.
E echo ku Kòrsou ta selebrando e logro históriko aki, ta danki primeramente na e turistanan di estadia ku a skohe pa bishitá nos pais pero tambe na nos pueblo lokal, trahadónan den industria di turismo i nos partnernan balioso di sektor privá i di sektor públiko. Pa selebrá e logro históriko, CTB den estrecho koperashon ku Curaçao Airport Partners (CAP) a entregá pasaheronan ku a yega Kòrsou awe dia 20 di novèmber un pakete di kos di boka dushi outéntiko di Kòrsou. E pakete a inkluí un mensahe indikando ku Kòrsou ta selebrando e yegada históriko di e di 500 mil turista di estadia. Minister di Desaroyo Ekonómiko, sr. Ruisandro Cijntje tabata presente na aeropuerto pa asina personalmente saludá nos bishitantenan riba e dia spesial aki. Minister Cijntje a indiká, “E logro eksepshonal di awe ta un testimonio ku ora nos traha huntu ku koperashon nos ta logra kosnan grandi. Un gradisimentu ta bai na tur stakeholders i e trahadónan dediká di industria di turismo pa nan kompromiso pa hasi e logro signifikante aki realidat.”
Ademas di rekonosé e logro di Kòrsou pa surpasá mei mion turista di estadia, CTB ta enfatisá tambe e benefisionan ku turismo, komo pila ekonómiko importante ta trese pa nos pais. Inkluyendo e impulso na nos ekonomia i krea mas trabou. Na mes momentu, CTB ta komprometé na e Plan Stratégiko di Desaroyo di Turismo pa krese turismo di manera responsabel i sostenibel, ku e meta pa mehora e eksperensia pa tantu nos turistanan i tambe pa nos komunidat lokal.
