3 buelo semanal…
WILLEMSTAD- 22 di desèmber 2023 – Den un ambiente ameno na CUR airport, a tuma lugá selebrashon di e konekshon direkto di Air Century entre Punta Cana, Repúblika Dominikana i Kòrsou. E skema ta inkluí 3 buelo semanal riba djaluna, djárason i djabièrnè. E buelonan lo keda efektuá ku un Bombardier CRJ200 ku un kapasidat di 50 stul. Na yegada di e buelo inougural na nos aeropuerto e avion a keda risibí ku e tradishonal saludo di awa.
Durante e seremonia a hiba palabra, Minister di Desaroyo Ekonómiko, sr. Ruisandro Cijntje, sr. Carlos Jimenez, Vise Presidente Ehekutivo di Air Century i sr. Jonny Andersen, CEO di CAP. Mas aleu, Minister Cijntje i sr. Muryad de Bruin (CTB), huntu ku representantenan di CAP i CAH a hasi entrega di un plakat konmemorativo na Air Century, ilustrando Otrobanda i nos famoso Koningin Emmabrug konosí komo ‘Swinging Old Lady’.
Kòrsou ya tin un relashon ku Air Century, e aerolínea ta ehekutando buelonan direkto for di Santo Domingo, Repúblika Dominikana. E aerolínea awor a amplia su skema di buelo, introdusiendo buelonan direkto for di Punta Cana pa Kòrsou. E konekshon nobo di Air Century ta habri posibilidat pa turistanan for di Punta Cana bin eksperensiá tur loke Kòrsou tin di ofresé. For di un variedat amplio di akomodashon te na diferente atrakshon turístiko, playanan bunita, un historia riku, eventonan, deportenan akuátiko, nos kushina lokal i mas ku tur kos e kaluroso hospitalidat di nos hendenan. Introdukshon di e buelo direkto nobo aki ta brinda tambe mas opshon di biahe pa nos pueblo lokal.
Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA) ta felisitá Air Century ku nan ruta nobo, Punta Cana – Kòrsou!
