WILLEMSTAD – 15 di yanüari 2024 – Ofisina di Turismo di Kòrsou (CTB) ta anunsiá ku orguyo un rèkòrt históriko pa turismo, markando 2023 komo e aña ku a registrá e mihó rèkòrtnan den kantidat di turista di estadia. Total Kòrsou a risibí 582.409 turista di estadia den 2023, kual ta un kresementu di 19% kompará ku aña 2022. Desèmber 2023 ta sobresalí komo e luna mas eksepshonal den término di bishita, ku un impulso impreshonante den kantidat di turista, establesiendo un rèkòrt den kantidat risibí den un solo luna. CTB a registrá un total di 63.390 turista di estadia na luna di desèmber, un kresementu di 41% kompará ku desèmber 2022.
E imágen abou ta mustra e prestashon mensual di 2023 kompará ku e meta mensual i e kantidat di turista risibí na 2022.
Desèmber 2023, un aña di triunfo:
Desèmber 2023 a resultá un éksito triunfante, ku un kantidat rèkòrt di 63.390 turista di estadia. E sifra impreshonante aki ta reflehá un kresementu supstansial di 41% kompará ku desèmber 2022, reforsando e posishon di Kòrsou komo un destinashon di biahe di promé kategoria durante temporada festivo. Algun faktor klave ku a impulsá e kresementu aki ta; kontribushon di aerolíneanan, introdukshon di produktonan nobo, merkadeo di forma konsistente i kolaborashon stratégiko entre sektor públiko i privá.
Turistanan for di Hulanda: Nos merkado primario a hunga un ròl signifikante den e éksito di luna di desèmber registrando un kresementu di 29% den kantidat di turista di estadia. Un total di 23.108 turista hulandes a keda registrá na desèmber 2023. Corendon, e aerolínea nobo riba e ruta Amsterdam – Kòrsou a hunga un papel importante den e prestashon impreshonante di luna di desèmber. E kolaborashon di KLM i TUI, kualnan a ekspandé nan servisionan durante e lunanan kaminda tin mas hende ta biaha, a yuda kontribuí na e resultado positivo di e merkado hulandes. E resultado di e buelonan adishonal for di Amsterdam ta hopi positivo despues di lunanan di prestashon abou for di Hulanda. E merkado hulandes ta representá 36.5% di tur e turistanan ku a biaha pa Kòrsou na luna di Desèmber, manteniendo su posishon di ta e merkado prinsipal pa Kòrsou.
Turistanan for di Estádos Unídos: E merkado di Estádos Unídos a mustra un prestashon rèkòrt registrando un total di 14.714 turista di estadia na desèmber, 41% kresementu kompará ku desèmber 2022. E kantidat di turista risibí for di e di dos merkado for di kua Kòrsou ta risibí mas tantu turista ta representá 23.2% na luna di desèmber. Total Kòrsou a risibí un kantidat remarkabel di 141.175 turista estadounidense durante 2023. E kresementu for di e merkado di Estádos Unídos ta 51% kompará ku 2022, kontribuyendo na un aña espektakular di turismo pa Kòrsou ku a kibra tur rèkòrt. Desaroyo di servisio aéreo for di Estádos Unídos tabata notabel durante di aña 2023, JetBlue ku su servisio di 5 biaha pa siman na lugá di 3 biaha pa siman. Na final di aña, nos a selebrá regreso di Delta Air Lines konektando Atlanta ku Kòrsou. United Airlines a inisiá e servisio pa Kòrsou mas trempan e temporada di wenter aki, i American Airlines konektando Charlotte diariamente na lugá di un biaha pa siman.
Turistanan for di Colombia: E merkado di Colombia a konkluí aña di forma triunfante logrando un kantidat rèkòrt di turista di estadia na luna di desèmber ku un kresementu eksepshonal di 76% totalisando 5.405 bishitante for di Colombia. E total di bishitantenan pa aña 2023 for di Colombia a alkansá un kantidat impreshonante di 39.414 turista di estadia (un kresementu di 38%), ilustrando un oumento supstansial den preferensia pa Kòrsou bou di e bishitantenan for di Colombia. Avianca a intensifiká su servisio entrante luna di òktober, di 8 biaha pa 11 biaha pa siman for di Bogotá, i Copa a bai di 4 buelo semanal na buelonan diario na final di aprel 2023.
Turistanan for di Canada: Canada, e di kuater merkado for di kua Kòrsou a risibí mas tantu bishitante a registrá un total ekstraordinario di 32.256 bishitante na 2023, markando un kresementu impreshonante di 165%. Desèmber a demostrá di ta un luna fuerte ku 4.674 bishitante kanades, reflehando un kresementu di 35% kompará ku desèmber 2022. E gran prestashon for di Canada ta atribuí prinsipalmente na e konsistensia den promoshon i e servisio di 3 biaha pa siman durante henter aña for di Toronto ku Air Canada. Adishonalmente, e oumento den kapasidat di Air Canada i WestJet den e delaster lunanan di aña a mustra un gran kresementu den kantidat di turista di estadia.
Turistanan for di Brazil: Brazil, e di 5 merkado for di kua Kòrsou a risibí mas tantu bishitante a konkluí aña ku un kantidat notabel di 26.815 turista brasilero. For di Brazil un kantidat di 3.665 turista di estadia a keda risibí na luna di desèmber 2023, un kresementu di 257% kompará ku desèmber 2022. E éksito den e merkado brasilero por keda atribuí na e promoshon konstante i tambe 2023 tabata e aña di e buelo inougural di Azul Airlines. E buelo direkto di Azul for di Belo Horizonte a inisiá ku e frekuensia di 1 biaha pa siman i pa final di aña a ekspandé na 2 buelo pa siman. E desishon stratégiko aki a kontribuí di forma signifikante na resultadonan positivo, demostrando e koperashon balioso di tur stakeholders. Banda di Azul Airlines otro opshonnan di konekshon via Panama ku Copa òf Bogota ku Avianca, ta mustrando resultadonan positivo pa Kòrsou.
E imágennan abou ta mustra primeramente e prestashon di kada region kompará ku 2022, inkluyendo e kantidat ku kada region ta representá den e total di turista di estadia ku a bishitá nos pais.
E di dos imágen ta ilustrá e prestashon di e tòp 5 paisnan inkluyendo e tòp 3 estadonan for di kua nos turistanan ta prosedente.
Turista di estadia, turista krusero i ‘day trippers’
Total 180.526 bishitante a bishitá Kòrsou na desèmber 2023. Manera menshoná anteriormente 63.390 turista di estadia a keda risibí kualnan a yega via di CUR airport. E turistanan aki a keda por lo ménos 1 anochi ku un máksimo di 90 dia. Tambe tin 2.452 bishitante mas ku a keda registrá via CUR airport, kual ta e personanan ku a regresá bèk riba e mesun dia ku nan a yega nos pais, e asina yama ‘day trippers’.
Di akuerdo ku Curaçao Ports Authority, un total di 114.684 turista krusero a keda registrá na luna di desèmber. E kantidat total di bishitante na luna di desèmber ta 20% mas kompará ku desèmber 2022 na momentu ku 95.891 bishitante a keda risibí.
Durante 2023 un kantidat total di 1.3 mion bishitante a bishitá Kòrsou, konsistiendo di 582.409 turista di estadia, 19.763 ‘day trippers’ i 710.769 turista krusero. Den 2022 un total di 1 mion bishitante a keda registrá.
Pa konkluí, Kòrsou ta selebrá e diversidat di su merkadonan i e esfuersonan kolaborativo di tur stakeholders ku a yuda pa logra e éksitonan remarkabel di 2023. E kresementu kontinuo den kantidat di turista for di tur e merkadonan prinsipal ta ilustrá e atrakshon global i aksesibilidat di nos pais. Aña 2023 tabata e aña kaminda nos a habri rutanan nobo pa nos pais i ekspandé e frekuensia for di rutanan eksistente. Nos a amplia e produkto ku ta keda ofresé ku akomodashonnan nobo, restorant- i atrakshonnan, diversifikando di e manera aki e opshonnan pa tur nos bishitantenan. Tur esaki den kombinashon ku aliansanan stratégiko a kontribuí na e éksito di 2023. Miéntras nos ta reflekshoná, nos ta wak padilanti pa sigui konstruí riba e logronan aki i pa den 2024 yama bon bini na ainda mas bishitante for di henter mundu.
