WILLEMSTAD- 31 di yanüari 2024 – Resientemente a tuma lugá firmamentu di e akuerdo pa maneho di Área di Rekreashon Marie Pampoen. E akuerdo a keda firmá entre Gobièrnu di Kòrsou den representashon di Minister di Desaroyo Ekonómiko, sr. Ruisandro Cijntje i Minister di Tráfiko, Transporte i Planifikashon Urbano, sr. Charles Cooper i Ofisina di Turismo di Kòrsou (CTB) representá pa sr. Hugo Clarinda, direktor athunto. Meta di e akuerdo di maneho ta pa sòru pa e área ku a keda desaroyá mantené su balor turístiko i rekreativo di un manera sostenibel.
E delaster añanan a tuma lugá desaroyo di e diferente fasenan di Área di Rekreashon Marie Pampoen. Na e momentunan aki ta finalisando e delaster trabounan na fase 3 mientrastantu e proseso di desaroyo di e plannan i alokashon di e fondonan nesesario pa e delaster fase (fase 4) ta tumando lugá. Área di Rekreashon Marie Pampoen ta ofresé un variedat di oportunidat pa rekreashon, deporte i di hasi negoshi, pa nos komunidat di Kòrsou en general i partikularmente e habitantenan di Marie Pampoen. Na mes momentu e área ta sirbi komo un atrakshon turístiko kaminda e turista ta topa ku e pueblo lokal i asina eksperensiá nos hendenan i nos pais. E proyekto ta finansiá for di fondonan ku ta keda fasilitá pa Ministerio di Desaroyo Ekonómiko (MEO) miéntras kordinashon di e proyekto ta den man di CTB.
Den e akuerdo ku a keda firmá, Gobièrnu di Kòrsou i CTB a fiha e kondishonnan bou di kua ta mantené e área i e fasilidatnan ku tin disponibel pa asina krea un eksperensia úniko i duradero pa tantu nos komunidat di Kòrsou i e turista ku ta bishitá e área.
