Durante boot Düsseldorf na Alemania….
WILLEMSTAD- 7 di febrüari 2024 – Ofisina di Turismo di Kòrsou (CTB) kompañá pa 5 partner di sektor privá tabata presente na e di 55 edishon di boot Düsseldorf. Ta trata aki di e feria di deportenan akuátiko di mas grandi ku ta tuma lugá anualmente na Alemania. Boot Düsseldorf 2024 a konta ku partisipashon di kasi 214 mil bishitante for di 120 pais. Meta di Kòrsou su partisipashon tabata pa presentá nos isla komo e destinashon ku e mihó sitionan pa sambuyá.
E aña aki e tim di Kòrsou a haña oportunidat pa presentá riba 2 podio durante di e feria. Riba e Dive podium, CTB huntu ku e partnernan di sektor privá a duna 4 entrevista presentando nos produkto turístiko. Tambe e tim a duna presentashonnan riba e Destination podium ilustrando Kòrsou komo e mihó destinashon turístiko. Ademas, e aña aki pa promé biaha CTB tabata e patrosinadó prinsipal di e Dive Award Show. E prestigioso premio aki a keda presentá den 5 kategoria na proyektonan ku tin entre otro komo meta, oumentá e konsientisashon tokante konservashon marítimo, mehora e eksperensia di e sambuyadó i envolví siudadanonan den práktikanan sostenibel pa konservá nos oséano pa futuro. Pa klousura Kòrsou su partisipashon na e feria, e tim di Kòrsou a organisá un Curaçao Cocktail Happy Hour ku a konta ku partisipashon di 150 invitado konsistiendo di konsumidónan, operadornan di tour i representantenan di media.
CTB ta gradisí partnernan di sektor privá ku e biaha aki a forma parti di e tim di Kòrsou; Sun Reef Village on Sea, Rancho El Sobrino, Dive Division, Curaçao Divers i Scuba Lodge. E feria di deportenan akuátiko a brinda e plataforma ideal pa presentá Kòrsou na e aleman gustadó di deportenan akuátiko, komo e mihó destinashon pa sambuyá. Ku un klima perfekto i un biodiversidat úniko nos pais tin hopi di ofresé tantu riba tera komo bou di awa.
