27% kresementu kompará ku yanüari 2023
WILLEMSTAD – 7 di febrüari 2024 – Ofisina di Turismo di Kòrsou (CTB) ta anunsiá un kresementu supstansial den kantidat di turista di estadia, registrando un kresementu remarkabel di 27% kompará ku yanüari aña pasá. Total Kòrsou a yama bon bini na 60.905 turista di estadia, posishonando Kòrsou komo un destinashon di biahe sumamente popular.
Den término di e kantidat ku kada region ta representá den e total di turista di estadia risibí, por indiká ku Kòrsou tin un base di bishitante diverso i kresiente. Europa ta liderá ku un total impreshonante di 42%, mustrando e atrakshon duradero di Kòrsou bou di e biahero europeo. Nort Amérika ta sigui, kontribuyendo ku 31% den e total risibí, esaki ta demonstrá e popularidat di Kòrsou bou di bishitantenan for di Estádos Unídos i Canada. Latino Amérika ta kontribuí ku un parti supstansial di 20%, enfatisando e atrakshon kresiente pa Kòrsou bou di bishitantenan prosedente di Sur Amérika. Region di Karibe, aunke un parti mas chikí den e totalidat, tòg tin un ròl signifikante, kontribuyendo ku 4% na e total risibí na luna di yanüari.
Tòp 5 merkadonan pa Kòrsou
Hulanda, e merkado primario pa Kòrsou, a eksperensiá un kresementu konsiderabel di 12%, yegando na un total di 22.174 turista di estadia. E disponibilidat di buelonan direkto for di Amsterdam, fasilitá pa KLM, TUI, i Corendon a hunga un ròl krusial den e kresementu registrá. Un total di 22% di e bishitantenan hulandes ta prosedente di Noord-Holland, 20% ta di Zuid-Holland i 13% ta residentenan di Noord-Brabant.
Estádos Unídos a registrá un kresementu notabel di 23% ku 13.605 turista di estadia na yanüari. E kapasidat adishonal di stul aéreo for di Charlotte ku American Airlines, for di Atlanta ku Delta i for di New York ku Jetblue a stimulá e bon prestashon na luna di yanüari. Ta antisipá un kresementu konstante durante henter aña for di Merka. Pa logra esaki lo maksimalisá e inisiativanan di merkadeo i fortifiká e kolaborashon ku stakeholders pa asina sigurá un strategia di kresementu sostenibel.
For di Canada, Kòrsou a selebrá un logro históriko na momentu ku Canada a surpasá 5 mil turista di estadia den un solo luna, yegando na un total di 5.446 turista na yanüari. Esaki ta otro resultado positivo di implementashon di un strategia di merkadeo konstante kombiná ku kresementu den kapasidat di stul aéreo. Aña pasá un kantidat di 4.306 kanades a keda registrá na luna di yanüari.
For di Colombia, e merkado a registrá un kresementu signifikante di 88% den kantidat di turista di estadia, totalisando 4.715 turista. Aña pasá un total di 2.505 kolombiano a keda risibí. Brazil a demostrá e kresementu den porsentahe di mas haltu registrando un kresementu ekstraordinario di 172% kompará ku yanüari 2023. Un total di 3.671 brasilero a skohe Kòrsou komo nan destinashon pa pasa vakashon. E buelo direkto di dos biaha pa siman ku Azul, huntu ku e kapasidat di stul aéreo adishonal for di Bogotá i Panama, a kontribuí na e éksito fenomenal aki. Aña pasá yanüari un kantidat di 1.351 brasilero a keda registrá.
Puntonan ku a destaká na yanüari 2024
Estadia na resort: 52% di turistanan di estadia a skohe pa e variedat di akomodashonnan ku ta keda ofresé pa resort hotels, inkluyendo resort grandi, chikí, all-inclusive i bùngalo resorts. Un total di 48% a opta pa keda na un otro alohamentu riba nos isla.
Sifranan demográfiko: E bishitantenan na luna di yanüari a demostrá un distribushon demográfiko interesante. E mayoria, 35%, ta kai den e grupo di edat entre 45 – 64 aña, miéntras e grupo di edat di 25 – 44 aña tabata 34% di e turistanan ku a bishita nos na yanüari.
Promedio di anochi: total turistanan di estadia a pasa 9.6 anochi riba Kòrsou na luna di yanüari, un bahada di 6% kompará ku aña pasá.
Prestashon turismo krusero: Na luna di yanüari un total di 48 barku krusero a bishitá nos pais ku un total di 123.230 turista krusero. Aña pasá yanüari, Curaçao Ports Authority (CPA) a raportá 42 barku krusero ku un total di 107.699 turista krusero.
Aña pasá tabata un aña espektakular pa nos industria di turismo i e ophetivo ta pa huntu krea un destinashon memorabel pa nos bishitantenan. CTB ta keda optimista pa loke ta e desaroyo sostenibel i floresente di turismo di estadia den e próksimo lunanan i pa e motibu aki a pone e meta pa alkansá un total di 670 mil turista di estadia den 2024.
E optimismo aki ta basá riba e kapasidat di stul aéreo konfirmá pa 2024 i e prestashon ku nos ta mirando for di tur e merkadonan di enfoke, demostrando un interes global amplio i duradero pa Kòrsou. E éksitonan aktual lo ta base pa por sigui krese pa medio di trahamentu huntu di forma stratégiko, enkurashá esfuersonan koloborativo ku tantu sektor públiko i privá i promoviendo Kòrsou komo e úniko destinashon den Karibe ku bo mester bishitá pa sintié pa bo mes….. Feel it for yourself.
