WILLEMSTAD – 15 di mart 2024 – Ofisina di Turismo di Kòrsou (CTB) ta anunsiá un kresementu supstansial den kantidat di turista di estadia na febrüari 2024, registrando un kresementu remarkabel di 42% kompará ku febrüari aña pasá. Total Kòrsou a yama bon bini na 60.235 turista di estadia, posishonando Kòrsou komo un destinashon di biahe sumamente popular den Karibe. E prestashon sobresaliente aki ta partikularmente notabel mirando ku ta trata di un luna ku ménos dia. Esaki ta sigui e start fuerte di luna di yanüari, kreando ekspektativanan positivo pa sobrá di 2024.
Kòrsou ta sigui sobresalí den kantidat di turista for di e diferente merkadonan i ta sigui atraé un variedat diverso di bishitante. Europa ta sobresalí komo e merkado primario pa turismo di Kòrsou, ku un total di 43% di e total di turista risibí. E porsentahe haltu aki ta mustra e atrakshon duradero di Kòrsou bou di e biahero europeo. Nort Amérika ta sigui mantené un presensia fuerte den e panorama turístiko di Kòrsou, kontribuyendo ku 35% den e total risibí. E fluho konstante di bishitantenan for di Nort Amérika ta ilustrá e aksesibilidat i atrakshon di nos isla pa bishitantenan for di Estádos Unídos i Canada. Sur Amérika tambe ta kontribuí notablemente na turismo di Kòrsou, representando 17% den e total di bishitante risibí. Adishonalmente, e popularidat di Kòrsou ta ekstendé su mes den área di Karibe ku 4% den e total risibí for di paisnan bisiña. E repartishon aki, ta enfatisá e éksito di Kòrsou den atraé un oudiensia mundial i establesiendo Kòrsou su posishon komo un destinashon di biahe di promé klase den region.
Prestashon tòp 5 merkadonan pa Kòrsou
Hulanda, e merkado primario pa Kòrsou, a demostrá un kresementu impreshonante di 36%, yegando na un total di 21.784 turista di estadia. Un total di 23% di e bishitantenan hulandes ta prosedente di Noord-Holland, 21% ta di Zuid-Holland i 13% ta residentenan di Noord-Brabant. Adishonalmente e distribushon di edat di bishitantenan hulandes ta reflehá un variedat diverso, 36%, ta kai den e grupo di edat entre 45 – 64 aña, miéntras e grupo di edat di 25 – 44 aña tabata 34%. Pa loke ta trata preferensia di akomodashon, mayoria bishitante hulandes a opta pa resort hotels (54%), miéntras e 46% restante a skohe un otro opshon di akomodashon disponibel riba nos isla.
Estádos Unídos a registrá un kresementu remarkabel di 47% ku 15.756 turista di estadia na febrüari. Di e bishitantenan di Estádos Unídos, 20% ta prosedente di New York, miéntras New Jersey i Florida kada un a kontribuí ku 6% na e total di turista risibí. E distribushon di edat di bishitantenan for di Estádos Unídos ta diverso, 41% ta kai den e grupo entre 45 – 64 aña i 34% ta entre 25 – 44 aña. Pa loke ta trata preferensia di akomodashon, 69% a opta pa resort hotels, miéntras e 31% restante a skohe otro opshon di akomodashon disponibel riba nos isla.
Canada a registrá un kresementu di 19% na luna di febrüari, ku un total di 5.136 turista di estadia. Esaki ta marka e di dos luna konsekutivo ku e kantidat di turista di estadia a surpasá e kantidat di 5000 den un solo luna, demostrando un patronchi konsekutivo di kantidat haltu di bishitante for di Canada. Turistanan kanades a keda un promedio di 9.4 anochi na luna di febrüari ku un preferensia pa resort hotels komo nan akomodashon di eskoho (54%).
Brazil a eksperensiá un kresementu remarkabel, registrando un oumento di 199% den kantidat di turista di estadia, yegando na un total di 3.552 bishitante. Esaki ta nifiká un oumento supstansial kompará ku e 1.189 risibí mesun luna na aña pasá. E turista brasilero a keda un averahe di 6.8 anochi. Pa loke ta trata eskoho di akomodashon, 65% di bishitantenan for di Brazil a opta pa resort hotels.
For di Colombia, e merkado Latino Amerikano, a eksperensiá un kresementu di 59% den kantidat di turista di estadia ku un total di 2.787 turista. Esaki ta marka un oumento signifikante kompará ku e 1.755 kolombiano risibí aña pasá febrüari. Turistanan kolombiano a keda un promedio di 5.5 anochi riba nos isla na luna di febrüari, ku un kantidat di 57% ku a skohe pa resort hotels miéntras e 43% restante a opta pa un akomodashon alternativo riba nos isla.
Puntonan ku a destaká na febrüari 2024
Estadia na resort: 54% di turistanan di estadia a skohe pa e variedat di akomodashonnan ku ta keda ofresé pa resort hotels, inkluyendo resort grandi, chikí, all-inclusive i bùngalo resorts. Un total di 46% a opta pa keda na un otro alohamentu riba nos isla.
Sifranan demográfiko: E bishitantenan na luna di febrüari a demostrá un distribushon demográfiko interesante. E mayoria, 36%, ta kai den e grupo di edat entre 45 – 64 aña, sigui serka pa e grupo di edat di 25 – 44 aña, ku a representá 34% di e turistanan ku a bishitá nos na febrüari.
Promedio di anochi: Total turistanan di estadia a pasa 9.0 anochi riba Kòrsou na luna di febrüari, un bahada di 4% kompará ku aña pasá.
Prestashon turismo krusero: Na luna di febrüari un total di 48 barku krusero a bishitá nos pais ku un total impreshonante di 125.210 turista krusero. Esaki ta marka un oumento notabel kompará ku e aña anterior, na momentu ku Curaçao Ports Authority (CPA) a raportá 42 barku krusero ku un total di 103.563 turista krusero.
Resúmen di aña te ku awor durante 2024
Aña a inisiá impreshonante ku un total di 121.140 turista di estadia den e promé dos lunanan di aña, registrando 34% kresementu kompará ku e mesun periodo na aña pasá. Tur merkado di enfoke a kontribuí na e kresementu aki i CTB ta mira gran perspektiva pa sobrá di aña. E strategia pa krese riba e éksito aktual ta pa medio di partnership stratégiko, enkurashá esfuersonan koloborativo ku tantu sektor públiko i privá i promoviendo Kòrsou komo e úniko destinashon den Karibe ku bo mester bishitá pa sintié pa bo mes….. Feel it for yourself.
