E programa ta den su rekta final
WILLEMSTAD – 22 di mart 2024 – Resientemente un total di 64 kursista a risibí nan sertifikado komo parti di e programa di training Her & Bijscholingstraject Hospitality Sector. E kursistanan a sigui un kurso kòrtiku intensivo (crash course) den kua nan a haña konosementu básiko teorétiko i tambe práktika pa por drenta e industria di hospitalidat. Ta trata di 20 guia turístiko, 20 artesano, 14 asistente di kòki, 3 weiter i 7 persona ku a terminá e kurso di Housekeeping. Durante un seremonia ameno, Minister di Desaroyo Ekonómiko, sr. Ruisandro Cijntje i Counterpart Director di Ofisina di Turismo di Kòrsou, sr. Muryad de Bruin, a hasi entrega di sertifikado na e partisipantenan.
E kurso di guia turístiko a enserá 3 luna di entrenamentu intensivo di teoria i abilidatnan práktiko pa bira un guia turístiko sertifiká. E sertifikado ta rekonosé pa Federashon Mundial di Asosashon di Guia Turístiko (WFTGA). Mayoria di e partisipantenan ya ta trahando den e industria dunando guia na turistanan. E kurso di artesania a keda organisá pa promé biaha. Durante 5 siman e partisipantenan a siña diseñá i krea nan propio artesania ku produktonan natural i lokal. Ademas e kursistanan a risibí un kurso di Empresa Chikí ofresé pa MEO pa haña informashon kon pa bira un empresario den nan área di trabou. Nan entrenamentu a keda klousurá ku partisipashon na e Feria di Arte durante Punda Vibes. E kursonan di asistente di kòki i weiter tabatin un durashon di 6 siman. E gruponan aki a kompletá tambe e Personal Empowerment training, dirigí riba desaroyo di nan abilidatnan interpersonal. Por último, e kurso di Housekeeping a trata entre otro, kon pa ehersé e trabou di un manera sigur, higiena personal, limpiesa general, drecha kama, materialnan, hèrmènt i komunikashon. Despues di a kompletá e diferente kursonan, e partisipantenan ta trahando na un leerbedrijf den industria di hospitalidat pa un periodo di 5 luna i ta risibí un salario. Despues di e 5 lunanan, e kompania tin e posibilidat pa ofresé e partisipante un kontrato di trabou basá riba su prestashon.
E programa di training ta resortá bou di Ministerio di Desaroyo Ekonómiko (MEO) i Ofisina di Turismo di Kòrsou (CTB) ta responsabel pa e implementashon. E programa ta keda ehekutá den estrecho kolaborashon ku Ministerio di Labor (SOAW), Ministerio di Enseñansa (OWCS) i partnernan den sektor privá. Mas di 30 kompania ta kontribuyendo na e proyekto komo leerbedrijf brindando e partisipantenan un oportunidat pa por praktiká i alabes haña un trabou den industria di hospitalidat. E programa di training ta den su rekta final. Pa registrá bai riba www.curacaotouristboard.com/education/
CTB, MEO, SOAW i OWCS ta felisitá e kursistanan i ta deseá nan tur klase di éksito den e industria di hospitalidat.
