WILLEMSTAD- 12 di aprel 2024 – Resientemente un delegashon di 40 agente di biahe prosedente di Argentina a bishitá Kòrsou pa sera konosí i eksperensiá e produkto turístiko úniko ku Kòrsou ta ofresé. E agentenan di biahe ku a bishitá Kòrsou ta prosedente di diferente siudat na Argentina manera entre otro, Buenos Aires, Rosario, Salta, Jujuy, Cordoba, Salto i Santa Fe Mendoza. Durante nan estadia, e delegashon a bishitá diferente hotèl, playa, atrakshonnan turístiko i nos sentro di siudat. Ku e konosementu atkerí, e agentenan di biahe por promové nos destinashon mihó ainda den e merkado di Argentina. E bishita a keda fasilitá pa e mayorista Eurovips i Ofisina di Turismo di Kòrsou (CTB).
E programa di 7 dia a inisiá parti pabou di nos isla ku bishita na Parke Nashonal Shete Boka, Playa Piskadó i Playa Kenepa kaminda e agentenan di biahe a hasi diferente aktividat akuátiko. Su siguiente dia e grupo repartí den diferente tim a partisipá na un speurtocht den nos sentro di siudat. Aki nan a haña e oportunidat pa konosé parti di nos historia, atmirá nos arkitektura, kana riba nos famoso Emmabrug i interaktuá ku lokalnan. Mas aleu durante nan estadia, e grupo a bishitá diferente akomodashon; Sunscape Curaçao Resort, Spa & Casino i Dreams Curaçao Resort, Spa & Casino kualnan tabata e 2 hotèlnan anfitrion, tambe nan a bishitá Zoëtry Curaçao Resort & Spa, Kunuku Aqua Resort, Renaissance Wind Creek Curaçao Resort, Curaçao Marriott Beach Resort, The Rif at Mangrove Beach Corendon Curaçao All-Inclusive, Curio by Hilton, LionsDive Beach Resort Curaçao i Papagayo Beach Resort. Adishonalmente, e agentenan di biahe a bishitá Curaçao Sea Aquarium, fábrika di likùr na Landhuis Chobolobo i tambe nan a disfrutá di un dushi ambiente na Bario Urban Street Food i Punda Vibes. Parti anochi e agentenan di biahe a eksperensiá un bunita bahada di solo for di riba laman durante un tour riba un katamaran. E tour tabata kortesia di Curaçao Airport Holding (CAH). E agentenan di biahe su satisfakshon ekspresá pa ku e biahe, ta suprayá nan apresio pa Kòrsou komo un destinashon turístiko importante.
Argentina ta un merkado kresiente pa Kòrsou. CTB ta gradisí CAH i e partnernan di sektor privá pa nan kolaborashon pa asina por a mustra e diversidat ku Kòrsou ta ofresé.
