WILLEMSTAD – 19 di aprel 2024 – Ofisina di Turismo di Kòrsou (CTB) ta kontentu pa anunsiá un kresementu signifikante den kantidat di turista di estadia na mart 2024. Nos pais a registrá un kresementu impreshonante di 38% den kantidat di bishitante kompará ku mart aña pasá, yegando na un total di 63.556 turista di estadia. Mart 2024 ta e mihó luna den historia pa loke ta trata kantidat di turista di estadia risibí. Ta e di kuater luna konsekutivo ku Kòrsou a risibí por lo ménos 60 mil turista di estadia den un solo luna. Ta for di luna di desèmber 2023 bini ariba Kòrsou ta risibiendo riba 60 mil turista di estadia i awor a yega su punto mas haltu na luna di mart 2024. E último wikènt di mart ta e momento ku a midi e tòp di mas haltu, ku un kantidat grandi di turista ku a skohe pa pasa e vakashon di Pasku di Resurekshon na Kòrsou. E logro aki ta reforsá mas ainda Kòrsou su popularidat kresiente komo un destinashon di biahe tòp den Karibe.
Kòrsou ta sigui atraé un base di bishitante diverso, ku Europa na promé lugá ku 40% di e merkado. Nort Amérika ta sigui serka, kontribuyendo ku 38%, reflehando e atrakshon di nos isla pa bishitantenan di Estádos Unídos i Canada, Sur Amérika ta representá 17% di tur bishitante risibí, miéntras e region di Karibe ta kontribuí ku 4%. E sifranan aki ta resaltá e atrakshon di Kòrsou i ta sigurá Kòrsou su reputashon komo un destinashon di biahe prominente.
Prestashon tòp 5 merkadonan pa Kòrsou
Hulanda, Kòrsou su merkado primario a registrá un total di 19.295 turista di estadia demostrando un kresementu notabel di 18% kresementu na Mart. Un total di 22% di e bishitantenan hulandes ta prosedente di Zuid-Holland, 20% di Noord-Holland i 13% ta residentenan di Noord-Brabant. Adishonalmente e distribushon di edat di bishitantenan hulandes ta reflehá un variedat diverso, 38%, ta kai den e grupo di edat entre 45 – 64 aña, miéntras e grupo di edat di 25 – 44 aña tabata 32%. Pa loke ta trata preferensia di akomodashon, mayoria bishitante hulandes a opta pa otro opshon di akomodashon (54%), miéntras e 46% restante a skohe pa keda na un resort hotel.
Un kantidat rèkòrt di turista di estadia a keda registrá for di Estádos Unídos na luna di mart. Pa promé biaha nos a risibí riba 18 mil turista merikano den un solo luna. Un total di 18.741 bishitantenan di Estádos Unídos a keda risibí, registrando un kresementu fuerte di 58% kompará ku aña pasá. Ademas, ta promé biaha ku e diferensia entre e kantidat di turista hulandes i esun merikano risibí tabata ménos ku mil bishitante den e mesun luna, ku solamente 561 turista di estadia separando e dos merkadonan. E merkado di Estádos Unídos ta sigurá su posishon komo un merkado importante pa Kòrsou. Di e bishitantenan di Estádos Unídos, 18% ta prosedente di New York, 7% di Florida miéntras New Jersey i North Carolina kada un a kontribuí ku 6% na e total di turista risibí. E distribushon di edat di bishitantenan for di Estádos Unídos ta primeramente esnan entre 45 – 64 aña (36%), siguí pa esnan entre 25 – 44 aña (33%). Pa loke ta trata preferensia di akomodashon, 68% a opta pa resort hotels, miéntras e 32% restante a skohe otro opshon di akomodashon disponibel riba nos isla. Turistanan merikano a keda un promedio di 6.2 anochi riba Kòrsou.
Canada a registrá un kresementu di 34% na Mart, ku un total di 5.144 turista di estadia. Esaki ta marka e di 3 luna konsekutivo kaminda e turistanan di estadia risibí a surpasá e kantidat di 5 mil den un solo luna. Turistanan kanades a pasa un promedio di 8.1 anochi riba nos isla na luna di mart, ku un preferensia pa resort hotels komo nan akomodashon elegí (58%).
Colombia, e di kuater pais ku mihó prestashon den kantidat apsoluto di turista di estadia a eksperensiá un kresementu remarkabel di 54% den turista di estadia ku un total di 4.228 bishitante. Turistanan kolombiano a keda un promedio di 5.4 anochi riba nos isla na luna di mart, ku 41% skohiendo resort hotels pa nan estadia, miéntras e 59% restante a opta pa keda na un akomodashon alternativo riba nos isla.
Brazil a eksperensiá un kresementu remarkabel, ku un oumento impreshonante di 150% den kantidat di turista di estadia, logrando un total di 3.329 bishitante. Esaki ta nifiká un oumento supstansial kompará ku e 1.329 turista brasilero registrá na aña pasá. Turistanan prosedente di Brazil a keda un promedio di 7 anochi riba nos isla na luna di mart. Pa loke ta trata eskoho di akomodashon, 56% a opta pa keda na un resort hotel.
Puntonan ku a destaká na mart 2024
Estadia na resort: 54% di turistanan di estadia a skohe pa e variedat di akomodashonnan ku ta keda ofresé pa resort hotels, inkluyendo resort grandi, chikí, all-inclusive i bùngalo resorts. Un total di 46% a opta pa keda na un otro alohamentu riba nos isla.
Sifranan demográfiko: E mayoria, 36%, ta kai den e grupo di edat entre 25 – 44 aña, siguí serka pa e grupo di edat di 45 – 64 aña, ku a representá 35% di e total di turistanan risibí.
Promedio di anochi: Total turistanan di estadia a pasa 8.4 anochi riba Kòrsou na luna di mart, un bahada di 5% kompará ku aña pasá.
Prestashon turismo krusero: Na luna di mart, un total di 42 barku krusero a bishitá nos pais ku un total impreshonante di 107.436 turista krusero. Esaki ta marka un prestashon stabil di e industria krusero ora kompará ku e aña anterior, na momentu ku Curaçao Ports Authority (CPA) a raportá 42 barku krusero ku un total di 107.607 turista krusero.
Resúmen di aña te ku awor durante 2024
Aña a inisiá impreshonante ku un total di 184.696 turista di estadia den e promé kuartal di aña, registrando 35% kresementu kompará ku e mesun periodo na aña pasá. Tur merkado di enfoke a kontribuí na e kresementu aki i CTB ta mira oportunidatnan prometedor pa sobrá di aña. E strategia pa sigui mehorá e éksito turístiko ta pa medio di partnership stratégiko i enkurashá esfuersonan koloborativo entre sektor públiko i privá. Meta di esaki ta pa mehorá aksesibilidat i posishoná Kòrsou komo e úniko destinashon den Karibe ku bo mester bishitá pa sintié pa bo mes….. Feel it for yourself.
