riba Dia Mundial di Turismo 27 di sèptèmber
WILLEMSTAD- 7 di mei 2024 – Durante di un rueda di prensa, Minister di Desaroyo Ekonómiko, sr. Ruisandro Cijntje huntu ku sr. Hugo Clarinda, direktor athunto di Ofisina di Turismo di Kòrsou (CTB) a duna informashon referente un Kumbre Nashonal di Turismo ku lo tuma lugá riba Dia Mundial di Turismo 27 di sèptèmber próksimo. Tur aña riba dia 27 di sèptèmber ta konmemorá Dia Mundial di Turismo ku e ophetivo pa promové e importansia di turismo i su balor sosial, kultural i ekonómiko. E enfoke di e kumbre ta riba kresementu duradero di e industria di turismo na benefisio di komunidat di Kòrsou. Durante di e kumbre lo identifiká tantu e oportunidatnan komo e retonan ku e ophetivo pa krese e industria di turismo di manera responsabel i traha huntu na un futuro briante.
E kumbre lo sirbi komo un plataforma pa tur stakeholders i potensial futuro partisipante den e industria di turismo por bin huntu pa informá, interaktuá i yega na resolushonnan konkreto riba kon atendé e kresementu turístiko ku Kòrsou ta eksperensiando. Komo preparashon pa e kumbre lo organisá den e lunanan benidero un serie di seshon di kua kada un lo keda kompañá pa un focus group. Durante di e seshonnan lo profundisá huntu ku diferente stakeholders riba 5 tópiko ku ta di relevansia pa ku e tema sentral di e kumbre. E tópikonan ku lo keda tratá durante di e serie di seshonnan promé ku e kumbra ta: identifiká oportunidatnan nobo, eksplorá e strategianan pa diversifiká e industria di turismo, preservá nos identidat kultural, natural i históriko, konsientisashon i partisipashon di komunidat lokal i kon pa keda kompetitivo mundialmente miéntras ta resaltá e loke ta hasi Kòrsou úniko. For di e seshonnan lo sali pre-resolushonnan ku lo keda diskutí den e kumbre na sèptèmber próksimo pa huntu yega na resolushonnan final. E resolushonnan final lo keda tradusí den akshonnan konkreto na benefisio di komunidat di Kòrsou i Kòrsou komo destinashon turístiko.
