WILLEMSTAD – 20 di mei 2024 – Resientemente Ofisina di Turismo di Kòrsou (CTB) a organisá un presentashon pa miembronan di Parlamento di Kòrsou i ministernan di Gabinete Pisas, titulá: Desaroyo di Turismo 2023 i 2024. E ophetivo prinsipal tabata pa mustra e impakto di e industria di turismo komo pilar ekonómiko importante pa nos pais. Durante e presentashon a duna un bista di e sifranan di turismo di estadia, airlift i e aktividatnan ku CTB ta ehekutá tantu riba tereno di merkadeo komo desaroyo di e produkto turístiko. Tambe a para ketu na e oportunidatnan i retonan pa e próksimo añanan. E apertura a keda hasí pa Minister di Desaroyo Ekonómiko, sr. Ruisandro Cijntje miéntras di parti di CTB; sr. Hugo Clarinda, direktor athunto, sr. Muryad de Bruin, Counterpart Director i sra. Christine Campagnard, Business Intelligence Manager a trese e presentashon dilanti.
Durante di e presentashon a duna detaye di e 5 merkadonan prinsipal Hulanda, Merka, Canada, Colombia i Brazil. Pa kada merkado a duna un bista di e averahe di anochi ku e turista ta keda, su eskoho di akomodashon, propósito di biahe, kuantu e ta gasta i e grupo di edat di e bishitantenan. Tambe a duna un bista di e oumento den konekshon aéreo, kantidat di kamber ku Kòrsou tin aktualmente i e proyektonan di konstrukshon di kambernan pa e próksimo añanan i e aktividatnan di merkadeo ku CTB ta ehekutá den e merkadonan prinsipal.
Riba tereno di desaroyo di e produkto turístiko a duna informashon di entre otro e progreso di e trayekto di turismo pa skol di fundeshi, e kampaña di konsientisashon ‘Kòrsou ta dushi’, programanan di training pa trahadónan den turismo i pa desempleadonan, proyektonan di desaroyo manera área di rekreashon Marie Pampoen i Zakito i por último a elaborá riba e strategia ku ta keda implementá den kuadro di turismo krusero. Na final, CTB a gradisí tur e parlamentarionan, Ministernan i e representantenan di e diferente ministerionan pa nan presensia. Nan a sa di kontribuí na e totalidat hasiendo pregunta i dunando sugerensianan na benefisio di turismo di Kòrsou. CTB ta sigui ku e esfuersonan pa konhuntamente ku partnernan di sektor públiko i privá promové nos pais komo e destinashon turístiko number 1 den Karibe.
