WILLEMSTAD – 27 di mei 2024 – Resientemente AFC Ajax i Ofisina di Turismo di Kòrsou (CTB) a ekstend’é e kolaborashon entre e dos partidonan. For di yanüari 2020 Kòrsou ta visibel komo partner riba manga di e shirt di unifòrm di Ajax, e akuerdo aki lo kontinuá te ku yanüari 2025. E akuerdo di partner ofisial a keda ekstendé awor te ku 2027.
Sr. Cas Biesta, direktor komersial interino na AFC Ajax a indiká: “Nos ta gradisí Ofisina di Turismo di Kòrsou pa e konfiansa demostrá. Ajax i Kòrsou, e último añanan a konektá na otro na diferente manera. Banda di e echo ku e kolaborashon tabata visibel den i rondó di vèltnan, e partnership a trese diferente kolaborashon na Hulanda i na Kòrsou. Nos ta sumamente kontentu ku prolongashon di e akuerdo pa e próksimo 3 añanan. Nos ta ansioso pa kompartí e hospitalidat i bon eksperensianan ku nos tin di Kòrsou ku tur hende.”
Na su turno, sr. Muryad de Bruin, Counterpart Director na CTB a trese dilanti: “Ku e prolongashon aki nos ta kompletá e aniversario di 5 aña komo partner riba e manga di e shirt. E visibilidat di Kòrsou riba manga di e shirt ikono di Ajax, a kontribuí internashonalmente na mas popularidat i apresio pa nos bunita isla, tantu serka esnan ku gusta wak futbòl i partikularmente serka fanátikonan di Ajax. Entrante yanüari nos lo sigui komo partner ofisial i nos lo keda visibel na diferente manera den stadion, na televishon i riba medionan sosial. I nos lo sigui organisá kampañanan ku premio pa nos fanátikonan.”
