WILLEMSTAD – 30 di mei 2024 – Resientemente Ofisina di Turismo di Kòrsou (CTB) a konkluí un rapòrt di e impakto sosial di CTB basá riba e kontribushon di e organisashon na e Metanan pa Desaroyo Sostenibel. E Metanan pa Desaroyo Sostenibel (SDGs) ta enserá 17 meta ku a keda formulá pa Nashonnan Uni komo un yamada universal pa tuma akshonnan pa eliminá pobresa, protehé nos planeta i sòru ku pa aña 2030 tur hende por biba den pas i prosperidat. Saliendo for di e punto di bista aki, CTB komo organisashon a tuma e inisiativa pa laga Fundashon D-TAP prepará un rapòrt di e kontribushon di CTB na e SDGs. E rapòrt ta yuda identifiká i midi e impakto di e aktividatnan ku CTB ta ehersé ku ta kontribuí na desaroyo sostenibel. Counterpart Director di CTB, sr. Muryad de Bruin kompañá pa sra. Lara Melkert di Fundashon D-TAP a hasi entrega ofisial di e rapòrt na Minister di Desaroyo Ekonómiko, sr. Ruisandro Cijntje.
Dor di raportá e kontribushon di CTB komo organisashon na e SDGs, CTB ta promové transparensia den su akshonnan lokual ta importante pa stakeholders manera entre otro Gobièrnu, komunidat lokal i turistanan. E rapòrt di CTB ta duna un resúmen di e inisiativanan ku CTB a ehekutá na aña 2021 i 2022 ku a kontribuí na e SDGs. Ta trata di proyekto i programanan ku a duna un kontribushon na desaroyo ekonómiko, redusí pobresa, mehora salu i bienestar, aportá na akseso na edukashon di kalidat i protekshon di ekosistema. E rapòrt ta inkluí resultadonan di e inisiativanan aki i ta duna rekomendashon pa mehorashon pa futuro.
E rapòrt a keda prepará pa sra. Lara Melkert di Fundashon D-TAP. Sra. Melkert tin konosementu i eksperensia amplio riba e área di desaroyo sostenibel dor di tareanan internashonal ku el a ehekutá i entrenamentunan ku el a sigui fasilitá pa Union Europeo i Nashonnan Uni. E fundashon su mishon ta pa promové práktikanan sostenibel i traha huntu ku organisashonnan i individuonan ku tin e mesun meta. E resultadonan i e rekomendashonnan inkluí den e rapòrt ta bai yuda CTB pa optimalisá strategianan i aktividatnan pa asina den futuro kontribuí mihó na e metanan pa desaroyo sostenibel.
