WILLEMSTAD- 4 di yüni 2024 – Den kuadro di e Kumbre Nashonal di Turismo ku Ofisina di Turismo di Kòrsou (CTB) huntu ku Ministerio di Desaroyo Ekonómiko (MEO) ta bai organisá riba Dia Mundial di Turismo 27 di sèptèmber próksimo, a tuma lugá e promé pre konferensia ku tópiko ‘Discovery’. Meta di e pre konferensia tabata pa huntu para ketu na e retonan i deskubrí i selebrá nos puntonan fuerte komo destinashon turístiko. Apertura di e pre konferensia a inkluí spich di Minister di Desaroyo Ekonómiko, sr. Ruisandro Cijntje i tambe Counterpart Director di CTB, sr. Muryad de Bruin.
E promé pre konferensia a konta ku partisipashon di 67 persona ku tin direktamente i indirektamente di aber ku industria di turismo. E partisipantenan a keda repartí den diferente grupo chikí kaminda kada grupo a eksplorá e retonan i tambe nos éksitonan dor di rekonosé nos forsa kolektivo i a usa esakinan pa visualisá un futuro optimista pa e industria di turismo i mas.
Den e próksimo lunanan promé ku e kumbre lo tene 4 pre konferensia mas. Tur lo ta dirigí riba tópikonan ku ta di relevansia pa e tema sentral di e kumbre kual ta kresementu duradero. E tópikonan ku lo keda tratá durante e siguiente pre konferensianan ta: 1) Diversidat, 2) Outentisidat, 3) Partisipashon di komunidat i 4) Kompetitividat. For di tur e seshonnan di pre konferensia lo sali pre resolushonnan ku lo keda diskutí den e kumbre na sèptèmber próksimo pa huntu yega na resolushonnan final. E resolushonnan final lo keda tradusí den akshonnan konkreto na benefisio di komunidat di Kòrsou i Kòrsou komo destinashon turístiko.
