WILLEMSTAD – 11 di yüli 2024 – Ofisina di Turismo di Kòrsou (CTB) ta kontentu di reportá otro kresementu rèkòrt di dòbel sifra den e kantidat di turista di estadia. Kòrsou a eksperensiá un oumento sólido di 13% kompará ku yüni di e aña anterior, yamando bon biní na un total di 50.123 bishitante den luna di yüni 2024. Remarkabel ta e kantidat apsoluto di bishitante alkansando 50.000 den loke normalmente ta un luna slou. E logro aki ta konfirmá e posishon di Kòrsou komo un destinashon tòp den Karibe.
Normalmente e lunanan di mei i yüni tabata mustra un promedio di 30.000 turista di estadia. Desde aña pasá, CTB a bin ta mira un oumento den kantidat surpasando 40.000 turista di estadia den e lunanan ariba menshoná. Durante e aña aki, e averahe a mantené na 50.000 turista di estadia demostrando e demanda grandi den turistanan ku ta skohé Kòrsou komo destinashon di fakansi.
Prestashon tòp 3 merkadonan pa Kòrsou na yüni
Hulanda: Yüni 2024 a trese 15.424 bishitante, ku ta un oumento di 12% kompará ku 13.804 na yüni 2023. Un poko mas ku mitar di e bishitantenan ulandes a opta pa akomodashon ku no ta resort hotel (52%), miéntras ku e sobra 48% a keda na un resort hotel durante nan estadia. E Hulandesnan a keda un averahe di 11.3 anochi den luna di yüni.
Estádos Unídos: Estádos Unídos ta sigui ta un merkado fuerte, registrando un oumento di 14% for di 13.071 na yüni 2023 pa 14.913 na yüni 2024. E preferensia di akomodashon pa e bishitante for di Estádos Unídos ta resort hotel (70%) danki na e variedat amplio ku nos isla tin di ofresé, miéntras ku e sobra 30% a opta pa otro opshonnan di alohamentu disponibel riba nos isla. Den promedio e bishitantenan di Estádos Unídos a keda un averahe di 6.0 anochi na Kòrsou.
Colombia: Bishitantenan for di Colombia a subi ku 43% ku ta 5.290 turista di estadia na yüni 2024 kompará ku 3.692 na yüni 2023. Den promedio, bishitantenan kolombiano a pasa 5.6 anochi riba nos isla na luna di yüni. Pa loke ta trata eskoho di akomodashon, 50% di bishitantenan kolombiano a opta pa resort hotel.
Resúmen promé mitar di aña 2024
E promé seis lunanan di 2024 a mustra un prestashon remarkabel di 346.774 turista di estadia, representando un kresementu di 27% kompará ku aña pasá. CTB ta antisipá un di dos mitar di aña hopi positivo ku potensial pa alkansá un total di 700.000 turista di estadia. Pa sigui impulsá éksito den nos turismo, CTB ta enfoká riba kolaborashonnan stratégiko i promové mas aliansa entre sektor públiko i privá. E esfuersonan aki tin komo meta pa amplia aksesibilidat i konsolidá e reputashon di Kòrsou komo destinashon úniko den Karibe, invitado bishitantenan pa nan sintié pa bo mes…. Feel it for yourself.
