Entrante 9 di desèmber
WILLEMSTAD – 2 di ougùstùs 2024 – Ofisina di Turismo di Kòrsou (CTB) ku sumo plaser ta informá ku e aerolínea Azul a anunsiá ku entrante 9 di desèmber próksimo nan lo dòbel e kantidat di buelonan entre Belo Horizonte, Brazil i Kòrsou yegando na un total di 4 buelo pa siman. Ademas Azul a inkluí un konekshon nobo saliendo for di Kòrsou pa Fort Lauderdale, Florida, di e manera aki introdusiendo un ruta nobo pa Kòrsou. E konekshon nobo, Kòrsou – Fort Lauderdale ta brinda e posibilidat pa Kòrsou risibí mas turista for di e área ei i na mes momentu e ta nifiká mas opshon di biahe pa nos pueblo lokal. E buelonan di Azul lo ta riba djaluna, djárason, djabièrnè i djasabra.
Aña pasá yüni, e aerolínea Azul a inisiá ku e ruta entre Belo Horizonte i Kòrsou ku un frekuensia di un buelo pa siman. Den ménos ku 1 aña a oumentá esaki na dos buelo pa siman i awor a drenta e bon notisia ku lo bolbe dòbel e kantidat di buelonan pa yega na un total di 4 buelo semanal. Azul a indiká ku e oumento aki ta komo resultado di e demanda kresiente for di Brazil pa Kòrsou i e bon relashon ku e aerolínea tin ku Ministerio di Desaroyo Ekonómiko di Kòrsou i CTB. Esaki ta tambe un logro di e trabou konhunto di CTB, Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA).
Sr. César Grandolfo, Institutional Relations Manager na Azul a indiká ku e oumentu ta resultado di demanda fuerte. “Kòrsou ya kaba ta un destinashon pa vakashon hopi deseá; ta un isla ku un klima agradabel i ku por keda bishitá kualkier momentu di aña. Awor, nos lo inkluí adishonalmente un konekshon na e buelo, permitiendo por ehèmpel, turistanan pa bishitá Kòrsou i despues bai shòp na Fort Lauderdale hasiendo uso di e mesun ticket”.
Di akuerdo ku Minister di Desaroyo Ekonómiko, sr. Ruisandro Cijntje, “Nos ta masha satisfecho ku e oumento den frekuensia di e buelo di Azul entre Belo Horizonte i Willemstad, Kòrsou. Ainda mas, den un aña ku nos ta surpasando tur nos metanan pa loke ta trata kantidat di turista di estadia for di Brazil. Kòrsou lo ta brasa habrí pa sigui risibí mas brasilero”. E buelonan nobo ya kaba ta disponibel via di wèpsait di Azul i agensianan di biahe. CTB ta sigui den estrecho kolaborashon ku aerolíneanan, partnernan di sektor públiko i privá ku e esfuersonan pa risibí mas bishitante i kompartí e bunitesa di nos pais.
