14 i 15 di ougùstùs
WILLEMSTAD- 8 di ougùstùs 2024 – Ofisina di Turismo di Kòrsou (CTB) i Ministerio di Desaroyo Ekonómiko (MEO) den estrecho kolaborashon ku CHATA lo organisá riba Dia Mundial di Turismo 27 di sèptèmber, un Kumbre Nashonal di Turismo riba e tópiko kresementu duradero di industria di turismo na benefisio di komunidat di Kòrsou. Dianan 14 i 15 di ougùstùs di 8 di mainta pa 12 di mèrdia lo tuma lugá e delaster 2 pre konferensianan komo preparashon pa e kumbre. Aki lo trata e temanan, envolvimentu di komunidat den turismo i kon pa keda kompetitivo lokalmente i mundialmente. Komunidat ta invitá pa huntu ku representantenan di industria di turismo kompartí ideanan i partisipá na diskushonnan riba temanan di relevansia pa logra kresementu duradero.
Den luna di mei i yüni a tene e promé 3 pre konferensianan, kaminda a para ketu na e retonan i puntonan fuerte di Kòrsou komo destinashon turístiko, diversidat i outentisidat. Riba dia 14 di ougùstùs próksimo lo profundisá riba entre otro, envolvimentu di komunidat den turismo, alsa e nivel di konsientisashon i partisipashon for di tur sektor, enkurashá envolvimentu di hóbennan den planifikashon di turismo i krea mas oportunidat pa empresarionan lokal. Su siguiente dia 15 di ougùstùs, lo trata e strategianan pa keda kompetitivo lokalmente i mundialmente. Tambe lo trata kon pa sostené empresarionan lokal i lo analisá e bareranan ku por stroba partisipashon den turismo. E pre konferensianan ta pa trahadónan den industria di turismo, empresarionan lokal, hóbennan (mínimo 18 aña) i tur persona ku ke duna un kontribushon na benefisio di desaroyo di turismo na Kòrsou.
For di e seshonnan lo sali pre resolushonnan ku lo keda diskutí den e kumbre na sèptèmber pa huntu yega na resolushonnan final. E resolushonnan final lo keda tradusí den akshonnan konkreto. Pa partisipá subi: curacaotouristboard.com/NTC2024 i registrá! E seshonnan ta grátis!
