WILLEMSTAD – 15 di ougùstùs 2024 – Ofisina di Turismo di Kòrsou (CTB) ta kontentu pa anunsiá otro kresementu impreshonante di dòbel sifra den kantidat di turista di estadia. Nos pais a registrá un oumento sólido di 16% den kantidat di bishitante kompará ku yüli aña pasá. Total 58.951 turista di estadia a keda risibí durante e lunanan di ‘zomer’.
E demanda fuerte pa Kòrsou komo destinashon di vakashon durante luna di yüli a pone nos yega na otro luna kaminda dos merkado a kibra rèkòrt den kantidat di turista di estadia. Tantu merkado di Hulanda komo Brazil a mustra un prestashon ekselente durante luna di yüli.
Prestashon tòp 3 merkadonan pa Kòrsou na yüli
Hulanda: Un kantidat di 24.569 turista di estadia hulandes a keda registrá na yüli, demostrando un kresementu di 27% kompará ku e 19.377 turista di estadia registrá na yüli 2023. Esaki ta hasi yüli 2024 un luna ku a kibra rèkòrt ku un total di 24.569 turista hulandes. Esaki ta e di dos biaha ku Kòrsou a risibí riba 24 mil turista hulandes; promé biaha tabata na desèmber 2021 na momentu ku un total di 24.069 turista hulandes a keda risibí. Mayoria turista hulandes (57%) a opta pa un otro opshon di akomodashon ku no ta resort, miéntras e 43% restante a skohe pa keda na un resort hotel. Turistanan hulandes a keda un promedio di 13.7 anochi na luna di yüli.
Estádos Unídos: Merka ta sigui ta un merkado fuerte, ku un oumento di 10% ora kompará e kantidat di 12.457 bishitante na yüli 2023 ku e 13.757 bishitante registrá na yüli 2024. E preferensia di akomodashon pa e merkado di Estádos Unídos ta e kantidat amplio di resort hotels (70%), miéntras e 30% restante a skohe otro opshon di akomodashon disponibel riba nos isla. Turistanan merikano a keda un promedio di 6.2 anochi riba Kòrsou.
Brazil: For di Brazil un total di 4.196 turista a keda risibí na yüli 2024 kual ta 42% mas kompará ku e 2.956 risibí na yüli 2023. Esaki ta nifiká un rèkòrt; pa promé biaha a registrá mas di 4 mil turista di estadia for di Brazil. Turistanan prosedente di Brazil a keda un promedio di 7.4 anochi riba nos isla na luna di yüli. Pa loke ta trata eskoho di akomodashon, 70% a opta pa keda na un resort hotel.
Resúmen di aña te ku awor durante 2024
E shete promé lunanan di 2024 a mustra un prestashon remarkabel, ku un total di 405.724 turista di estadia, representando 25% kresementu kompará ku e mesun periodo na aña pasá. Tur merkado di enfoke ta mustrando un bon prestashon den kantidat di turista di estadia pa e promé 7 lunanan di aña. Te ku awor Kòrsou a risibí un total di 144.748 turista hulandes i 105.375 turista merikano. Colombia, Brazil i Canada a registrá respektivamente, 26.955, 25.082 i 22.297 turista di estadia. Total e 5 merkadonan huntu ta representá 80% di tur turista di estadia risibí durante e promé 7 lunanan di aña.
