WILLEMSTAD – 13 di sèptèmber 2024 – Ofisina di Turismo di Kòrsou (CTB) ta kontentu pa anunsiá otro kresementu remarkabel di dòbel sifra den kantidat di turista di estadia. Nos pais a registrá un oumento sólido di 18% den kantidat di bishitante kompará ku ougùstùs aña pasá registrando 9.033 mas turista di estadia. Total 58.291 turista di estadia a keda risibí na ougùstùs 2024.
E delaster siman di ougùstùs a registrá un kantidat signifikante di turista danki na e Curaçao North Sea Jazz Festival. Sifranan preliminar ta indiká ku e edishon aki a atraé un kantidat supstansial di turista, espesialmente for di Aruba, Sürnam, Colombia, Brazil, Estádos Unídos i Hulanda.
Prestashon tòp 3 merkadonan pa Kòrsou na ougùstùs
Hulanda: Un kantidat di 20.935 turista di estadia hulandes a keda registrá na ougùstùs, demostrando un kresementu di 22% kompará ku e 17.146 turista di estadia registrá na ougùstùs 2023. Mayoria turista hulandes (52%) a opta pa un otro opshon di akomodashon ku no ta resort, miéntras e 48% restante a skohe pa keda na un resort hotel. Turistanan hulandes a keda un promedio di 11.7 anochi na luna di ougùstùs.
Estádos Unídos: Merka ta sigui ta un merkado fuerte, ku un oumento di 24% ora kompará e kantidat di 11.834 bishitante na ougùstùs 2023 ku e 14.703 bishitante registrá na ougùstùs 2024. E preferensia di akomodashon pa e merkado di Estádos Unídos ta e kantidat amplio di resort hotels (69%), miéntras e 31% restante a skohe otro opshon di akomodashon disponibel riba nos isla. Na ougùstùs, turistanan merikano a keda un promedio di 5.6 anochi riba Kòrsou. E bishitantenan for di Estádos Unídos ta primordialmente for di New York, New Jersey i Florida.
Colombia: For di Colombia un total di 4.317 turista a keda risibí na ougùstùs 2024 kual ta 37% mas kompará ku e 3.153 risibí na ougùstùs 2023. Turistanan prosedente di Colombia a keda un promedio di 4.9 anochi riba nos isla na luna di ougùstùs. Pa loke ta trata eskoho di akomodashon, 54% a opta pa keda na un resort hotel.
Resúmen di aña te ku awor durante 2024
E ocho promé lunanan di 2024 a mustra un prestashon impreshonante, ku un total di 464.017 turista di estadia, representando 24% kresementu kompará ku e mesun periodo na aña pasá. Tur merkado di enfoke ta mustrando un bon prestashon den kantidat di turista di estadia pa e promé 8 lunanan di aña. Te ku awor Kòrsou a risibí un total di 165.980 turista hulandes i 120.078 turista merikano. Colombia, Brazil i Canada a registrá respektivamente, 31.272, 27.981 i 23.505 turista di estadia. Kontando huntu turistanan krusero, day trippers i turistanan di estadia, un total di 1.042.754 a keda registrá di yanüari pa ougùstùs 2024, esaki ta un kresementu di 23% kompará ku e mesun periodo na aña pasá.
