WILLEMSTAD- 27 di sèptèmber 2024 – Riba 27 di sèptèmber a tuma lugá e Konferensia Nashonal di Turismo dirigí riba kresementu sostenibel di e industria di turismo. E konferensia ta e kulminashon di 5 pre-konferensia ku a tuma lugá durante e promé mitar di aña. E ophetivonan di e konferensia tabata pa primeramente konmemorá Dia Mundial di Turismo, dor di resaltá e importansia di e industria di turismo pa Kòrsou, lanta e konsiensia i promové partisipashon entre stakeholders referente e tema sentral, proponé resolushonnan ku por keda implementá pa manehá e kresementu di turismo i por último pa mehorá e efektividat di plannan di desaroyo sostenibel dor di instituí un struktura di implementashon nobo. E konferensia organisá pa Ministerio di Desaroyo Ekonómiko (MEO), Ofisina di Turismo di Kòrsou (CTB) i Curaçao Hospitality & Tourism Association (CHATA) a konta ku partisipashon di mas di 300 persona. Apertura di e konferensia a keda hasí pa Minister di Desaroyo Ekonómiko, sr. Charles Cooper ku a enfoká riba e importansia di industria di turismo pa Kòrsou, e kresementu ku nos ta eksperensiando komo pais i e ròl di kada aktor den esaki.
Komo parti di e programa di e konferensia a invitá Sekretario-General i CEO di Caribbean Tourism Organization, sra. Dona Regis-Prosper komo orador prinsipal pa kompartí su konosementu ku esnan presente. Sra. Regis a trata e tópiko di kresementu di turismo na Kòrsou di un manera sostenibel. Den su spich sra. Regis a indiká ku “Karibe ta e region mas dependiente di turismo, ku un kontribushon di 11.4% na e GDP di e region, 2.75 mion trabou generando un total di $41.4 bion na entrada generá for di loke e turista ta gasta. E sifranan aki ta resaltá e importansia di eventonan manera esun di awe i diálogonan ku lo sigui ku mira riba kresementu sostenibel i resiliensia di nos industria di turismo.” Den kuadro di e tópiko sentral di e konferensia sra. Regis a kompartí e 5 P-nan di turismo sostenibel kual ta people (hende), planeta, prosperidat, propósito i partnership i el a añadí un di 6 P ku ta para pa pas kual tabata e tema sentral di Dia Mundial di Turismo e aña aki. Mas aleu e programa a inkluí diferente foro habrí kaminda ekspertonan lokal a kompartí nan konosementu riba tópikonan manera; konstruyendo un futuro sostenibel i empoderá i envolví nos komunidat lokal. Tambe a invitá kompanianan pa kompartí nan eksperensia i strategianan di ehekushon di nan aktividatnan ku esnan presente.
Durante e último seshon a kompartí ku esnan presente e 12 resolushonnan ku a keda skohé komo prioridat for di un lista di 24 resolushon ku a sali for di e 5 pre-konferensianan. Ta trata di resolushonnan ku e meta pa logra kresementu sostenibel di e industria di turismo. Un di e resolushonnan ta institushon di un struktura di implementashon nobo ku ta kubri e siguiente 5 ministerionan: Ministerio di Desaroyo Ekonómiko (MEO), Ministerio di Transporte i Infrastruktura (VVRP), Ministerio di Medio Ambiente (GMN), Ministerio di Edukashon i Kultura (OWCS) i Ministerio di Desaroyo Sosial i di Labor (SOAW). E ministernan ta forma parti di e steering committee kual ta presidí pa e Minister di Ekonomia. E struktura di implementashon nobo a keda formalisá ku firmamentu di un dekreto nashonal. E meta di e struktura nobo ta pa logra pa aselerá implementashon di e diferente akshonnan aliniá na e Strategic Tourism Destination Development Plan. Ademas lo tin 2 plataforma di konsulta ku partisipashon di sektor privá, NGO’s i komunidat pa asina haña nan sosten den ehekushon di e akshonnan.
