WILLEMSTAD – 30 di sèptèmber 2024 – Resientemente, Ofisina di Turismo di Kòrsou (CTB) a inougurá Curaçao Experience, un sentro di eksperensia inovativo ubiká den e sentro komersial Nuestro Bogotá na Colombia. Ta trata di un lokalidat ku ta kombiná e último teknologia ku informashon di Kòrsou su produkto turístiko dunando e bishitante e oportunidat pa eksplorá nos destinashon hasiendo uso di hèrmèntnan teknológiko moderno manera metaverse, weganan online i pantayanan interaktivo. E konsepto aki ta e promé na Colombia i den henter Latino Amérika. Ademas, den e sentro lo tin stashonnan pa hasi reservashon kaminda agentenan di biahe i partnernan di Kòrsou lo tei presente pa asistí esnan ku mesora ke hasi nan reservashon pa bishitá Kòrsou. Apertura di e sentro a keda hasí pa Minister di Desaroyo Ekonómiko, sr. Charles Cooper.
Saliendo for di e slogan di Kòrsou esta ‘Feel it for yourself’, e bishitantenan di e sentro por eksplorá nos pais i deskubrí nos diversidat riku, kultura, arkitektura, variedat di eventonan i asta eksperensiá nos bida bou di laman di forma virtual. E sentro tin 7 stashon ku ta ofresé diferente eksperensia adaptá na e mucha, adulto, pareha i famia. Algun teknologia importante den e sentro ta: VR glasses, ta un tipo di brel ku ta laga e usuario hinka su mes den un mundu digital eksplorando diferente sitio, dunando e sintimentu di ta físikamente presente. Lo hasi uso tambe di e teknologia di ‘Metaverse’ kaminda e bishitante por usa brelnan virtual pa eksplorá nos pais via di Kòrsou su propio mundu virtual. Adishonalmente, e sentro lo inkluí diferente proyekshon tantu ariba, abou komo na e murayanan di e lokalidat ilustrando imágennan kolorido i videonan bunita di nos pais. Ademas, e sentro lo inkluí tambe un stashon kaminda e bishitante por skohe e pakete di biahe ku mas ta kumpli ku su preferensianan i presupuesto i hasi su reservashon mesora.
E inougurashon di e sentro ta yega na un momentu di hopi optimismo kaminda e proyekshon ta ku aña 2024 lo klousurá ku riba 42 mil turista di estadia for di Colombia. CTB ta sigui bini ku konseptonan inovativo ku e meta pa atraé mas bishitante pa nos pais.
