WILLEMSTAD- 1 di òktober 2024 – Awe, promé di òktober 2024, Ofisina di Turismo di Kòrsou (CTB) ta orguyoso di selebrá 35 aña sirbiendo nos pais. Pa mas di tres dékada i mei nos a dediká nos mes na promové Kòrsou komo un destinashon turístiko di promé klase tantu pa vakashon komo pa negoshi. E esfuersonan ku CTB a bin ta hasi ta resaltá nos pais su kultura vibrante, paisahenan impreshonante, playanan bunita i nos hospitalidat kaluroso miéntras ta sigurá kresementu sostenibel i benefisio riba término largu pa nos komunidat. Durante añanan, CTB a ehekutá vários proyekto enfoká riba implementashon di kampañanan di merkadeo, promoshon i di konsientisashon. Tambe a duna aporte i inisiá esfuersonan pa mehorá e eksperensia di e turista. Ademas, CTB ta kolekta i raporta datonan di turismo i duna konseho na gobièrnu riba tópikonan relashoná ku turismo. CTB ta inmensamente orguyoso di tur e logronan i ta spera pa logra mas den kolaborashon ku partnernan di sektor públiko i priva, stakeholders internashonal i komunidat lokal.
Ophetivonan prinsipal pa 2024
Aña 2024 ta mustra di bira otro aña kaminda Kòrsou lo kibra tur rèkòrt. Un di ophetivonan prinsipal ta pa klousurá aña 2024 ku un total di 670 mil turista di estadia. Na sèptèmber, Kòrsou a surpasá kaba mei mion turista di estadia, un logro ku a keda alkansá aña pasá na luna di novèmber. Nos 5 merkadonan tòp, Hulanda, Estádos Unídos, Colombia, Brazil i Canada ta sigui presta di forma eksepshonal. E kresementu remarkabel aki ta resaltá e interes pa nos pais i e dedikashon di tur hende den industria di turismo. Otro ophetivo importante ta pa kolaborá ku partnernan di sektor públiko i privá pa asina krea eksperensianan inolvidabel durante e turista su estadia. Esaki dor di mehorá e produkto turístiko i e servisio na kliente, duna un kontribushon na fortifiká e kapital humano na Kòrsou i fomenta konekshonnan signifikativo entre nos komunidat i bishitantenan.
Dekreto nashonal dirigí riba desaroyo sostenibel di turismo
Resientemente, den kuadro di selebrashon di Dia Mundial di Turismo, CTB huntu ku Ministerio di Desaroyo Ekonómiko i Curaçao Hospitality & Tourism Association a organisá e Konferensia Nashonal di Turismo kaminda a firma un dekreto nashonal dirigí riba desaroyo sostenibel di turismo. E dekreto ta deskribí institushon di un struktura di implementashon nobo dirigí riba aselerá implementashon di diferente akshon aliniá na e Strategic Tourism Destination Development Plan 2022 – 2026 (STDDP). Manehá e kresementu sostenibel di industria di turismo, huntu ku tur partner i implementá e STDDP 2022 – 2026 ta keda e prioridatnan prinsipal pa CTB.
CTB ta gradisí Gobièrnu di Kòrsou, tur e partner di industria di turismo i komunidat pa nan sosten durante tur e añanan. Nos ta mira dilanti riba hopi aña mas inspirando biaheronan pa bishitá Kòrsou i eksperensiá nos dushi pais pa nan mes.
