WILLEMSTAD – 16 di òktober 2024 – Ofisina di Turismo di Kòrsou (CTB) ta kontentu pa anunsiá otro kresementu den kantidat di turista di estadia, ounke tradishonalmente sèptèmber ta konosí komo un luna slou. Nos pais a registrá un oumento sólido di 8% den kantidat di bishitante kompará ku sèptèmber aña pasá registrando 3.903 turista di estadia adishonal. Total 49.858 turista di estadia a keda risibí na sèptèmber 2024.
Prestashon tòp 3 merkadonan pa Kòrsou na sèptèmber
Hulanda: Un kantidat di 17.185 turista di estadia hulandes a keda registrá na sèptèmber, demostrando un kresementu di 12% kompará ku e 15.334 turista di estadia registrá na sèptèmber 2023. Mayoria turista hulandes (54%) a opta pa un otro opshon di akomodashon ku no ta resort, miéntras e 46% a skohe pa keda na un resort hotel. Turistanan hulandes a keda un promedio di 11.6 anochi durante nan estadia.
Estádos Unídos: Estádos Unídos ta sigui ta un merkado fuerte pa Kòrsou, ku un oumento di 13% yegando un total di 11.908 bishitante na sèptèmber 2024, kompará ku 10.497 risibí e mesun luna na aña pasá. Mayoria turista merikano (73%) a skohe pa resort hotels, miéntras 27% a opta pa otro opshon di akomodashon. Turistanan prosedente di Estados Unídos a keda un promedio di 5.8 anochi riba Kòrsou, miéntras mayoria tabata prosedente di New York, New Jersey i Florida.
Brazil: E merkado di Brazil a registrá un subida di 24% na sèptèmber 2024, yegando na un total di 3.821 turista kompará ku e 3.079 risibí na sèptèmber 2023. Turistanan prosedente di Brazil a keda un promedio di 6.5 anochi riba nos isla kaminda un total di 63% a skohe pa un resort hotel.
Resúmen di aña te ku awor durante 2024
Na fin di sèptèmber 2024 ya Kòrsou a surpasá mei mion turista di estadia yegando na un total di 513.875 turista te ku awor. Aña pasá Kòrsou a surpasá mei mion turista te na luna di novèmber, e kantidat risibí te ku awor ta reflehá un kresementu remarkabel di 23% kompará ku e mesun periodo na 2023. Faltando 3 luna mas pa aña terminá, CTB ta afirmá di lo surpasá e kantidat di 670 mil turista di estadia kual previamente a keda anunsiá komo e total ku lo bai yega pa final di e aña aki. Kòrsou su industria di turismo a demostrá stabilidat den 2024, ku e esfuerso stratégiko pa keda konsistente den akshonnan di promoshon den e merkadonan di enfoke prinsipal. E kresementu aki ta resaltá e éksito di nos pais den krea demanda dor di mustra tur loke nos tin di ofresé pa bin “Sinti’é pa bo mes” (Feel It For Yourself).
Te ku awor Kòrsou a risibí 513.875 turista di estadia, 20.316 day trippers, 592.686 turista krusero, yamando bon biní na un total di 1.126.877 turista di yanüari pa sèptèmber 2024, kual ta 22% kresementu kompará ku e mesun periodo na aña pasá.
