Entrante 18 di desèmber
WILLEMSTAD- 21 di òktober 2024 – Ofisina di Turismo di Kòrsou (CTB) ku sumo plaser ta informá ku e aerolínea Wingo a anunsiá ku entrante 18 di desèmber próksimo nan lo introdusí un ruta nobo pa Kòrsou for di Medellín, kual ta e di dos siudat mas grandi di Colombia. Ku lansamentu di e ruta nobo, Wingo lo tin 2 konekshon di buelo pa Kòrsou esta for di Bogotá i awor tambe Medellín. E buelonan for di Medellín lo keda efektuá dos biaha pa siman riba djárason i djasabradurante temporada haltu. Ku e konekshon nobo, Wingo lo pone kasi 3 mil stul pa luna pa ehekushon di ámbos konekshon pa Kòrsou.
E konekshon nobo di Wingo lo ta durante temporada haltu esta luna di desèmber, yanüari, yüni, yüli i ougùstùs. E buelo direkto for di Medellín lo brinda e posibilidat pa Kòrsou risibí mas turista for di Colombia i na mes momentu e ta nifiká mas opshon di biahe pa nos pueblo lokal. Entrante awe Wingo ta inisiá ku promoshon di e konekshon nobo ku preisnan spesial.
“Nos ta kontentu di por añadí e ruta nobo aki entre Colombia i Kòrsou, pa sigui kontribuí na e fluho bilateral di bishitante i turismo entre ámbos pais. Ku e ruta nobo aki, hopi mas kolombiano i partikularmente esnan prosedente di Medellín, lo ke biaha pa bai konosé e playanan bunita ku Kòrsou ta ofresé”, asina sr. Jorge Jiménez, VP Komersial i di Planifikashon na Wingo a indiká.
Sr. José Alejandro González, Sekretario di Turismo i Entretenimientu di Medellín a ekspresá; “Ta komprobá estadístikamente ku ora un siudat haña mas ruta aéreo, e merkado ta krese. Nos ta hopi kontentu ku e konfiansa ku e aerolínea Wingo tin den Medellín ku e ruta nobo entre Medellín i Kòrsou, un merkado ku ta bira potensial pa nos”.
Den 2024 Colombia a konsolidá su mes komo e di tres merkado mas importante pa Kòrsou ku un oumentu di 31% den kantidat di turista di estadia kompará ku 2023. Ku apertura di e frekuensia nobo di Wingo, ku lo konektá Medellín ku Kòrsou, CTB ta optimista ku nos lo sigui ekspandé e merkado aki i posishoná nos mes komo un di e destinashonnan preferí pa kolombianonan. E proyekshon ta, ku aña 2024 lo klousurá ku riba 42 mil turista di estadia for di Colombia i di e manera aki sigui stimulá kresementu di turismo i nos ekonomia lokal. CTB, Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA) ta deseá Wingo tur kos bon ku e konekshon nobo for di Medellín.
