WILLEMSTAD- 29 di òktober 2024 – Di 23 di sèptèmber pa 23 di òktober, Ofisina di Turismo di Kòrsou (CTB) a organisá e di dos edishon di Kids Tourism Experience pa alumnonan di skol di fundeshi i skol spesial. Komo parti di e proyekto, e muchanan a partisipá na diferente tour, workshop i aktividat edukativo pa sera konosí di aserka ku e industria di turismo. E proyekto ta forma parti di e programa di introdukshon di turismo na skol kual a keda lansá 2 aña pasá. Meta di introdukshon di turismo komo materia ta pa yuda amplia nos muchanan su konosementu riba e importansia di turismo pa nos pais i na mes momentu lanta e interes pa e industria importante aki. Meskos ku aña pasá, alumnonan di grupo 5 a trata e materia di turismo via videonan i un buki di tarea i awor a haña e oportunidat pa eksperensiá pa nan mes parti di loke nan a mira den e videonan. Un total di 954 alumno di 28 skol a partisipá na Kids Tourism Experience 2024.
Komo parti di Kids Tourism Experience 2024, e alumnonan a partisipá na diferente tour edukativo. Entre otro; nos aeropuerto pa mira kon turistanan ta drenta nos pais, hotèlnan ku e turista por skohe pa keda na dje, diferente aktividat kultural, Mega Pier pa mira e sitio kaminda turistanan krusero ta drenta nos pais, diferente atrakshon turístiko manera Amazonia, kore den trolley, eksperensiá e supmarino, bishitá Parke di Abestrus i hopi mas. Un total di 22 partner den industria di turismo a habri nan porta di manera boluntario pa e alumnonan bin eksperensiá nan produkto i servisio. E muchanan a hasi hopi pregunta ku sigur lo yuda nan komprondé mas mihó loke nan ta siña durante e lèsnan di e materia di turismo. E gastunan di transporte pa bishitá e diferente sitionan a keda kubrí pa CTB. E aña aki atrobe e partnernan partisipante a ofresé e muchanan un eksperensia inolvidabel. CTB ta trahando aktualmente riba introdukshon di e materia di turismo den grupo 6 tambe. E material lo inkluí diferente video ku tópikonan interesante relashoná ku turismo.
CTB ta gradisí tur e partnernan ku a forma parti di e proyekto aki: Aloe Vera Farm Curaçao, Amazonia Curaçao, Atlantis Adventures Curaçao, Avila Beach Hotel, Bario Hotel, Carmabi, Children’s Museum Curaçao, Curaçao International Airport, Curaçao Marriott Beach Resort, Curaçao Ostrich farm, Curaçao Ports Authority, Fiesta Tours Curaçao, Curaçao Hato Caves, Kontiki Beach Resort, Landhuis Bloemhof, Landhuis Chobolobo, Landish, LionsDive Beach Resort, Mikve Israel Emanuel Synagogue and Jewish Cultural Historical Museum, Papagayo Curaçao, Renaissance Wind Creek Curaçao Resort i San Marco Hotel & Casino.
