WILLEMSTAD- 31 di òktober 2024 – Dia 7 di novèmber próksimo lo tuma lugá aki na Kòrsou estreno di e pelíkula nobo internashonal ‘Dating My Past’ den kual Chanelle de Lau tin e ròl prinsipal. Chanelle ta karga diferente título di beyesa, di 4 finalista Miss Supranational 2024, promé finalista Miss International 2017 i Miss Universe Curaçao 2016. E echo ku Chanelle komo yu di Kòrsou ta figurá den un pelíkula internashonal ta sigur algu grandi pa Kòrsou i pa su karera komo artista profeshonal. Den e pelíkula ‘Dating My Past’, Chanelle ta hunga e papel di Lexie, un terapista relashonal ku ta reflekshoná riba su propio relashonnan amoroso di den pasado, kada unu ku nan propio retonan i lèsnan di bida. Miéntras Lexie ta nabegá su historia personal e ta deskubrí nifikashon berdadero di balor propio, kual ta hib’é na redefiní su manera di mira amor. E pelíkula, ta dirigí pa Ricky Burchell i inspirá pa e buki ‘The Power Within, A Woman’s Worth: From Both Sexes’ di Aaron Jordan Jr.
Semper Chanelle tabatin un sintimentu di atmirashon pa e industria di entretenamentu. Aunke semper el a haña aktuashon algu eksitante, esaki no tabata su soño for di chikí komo e tabata hopi tímido. Pero su partisipashon den e mundu di beyesa a trese un kambio den e manera kon e ta atendé ku su propio limitashonnan. E momentu ku el a bira un embahador pa Kòrsou na aña 2016, tabata un paso grandi den su bida kual a poné realisá kuantu kos e ta kapas di por logra realmente. Chanelle su karera artístiko a kuminsá na 2018 na momentu ku el a muda pa Los Angeles pa siguí un karera den modelahe i aktuashon komersial. Na e skol di aktuashon North Hollywood, el a siña entre otro teater kual huntu ku diferente workshop di aktuashon komersial a yuda desaroyá su abilidatnan komo aktris. ‘Dating My Past’ ta marka e di tres biaha ku Chanelle ta paresé den un pelíkula i e ta sumamente kontentu pa a tuma e ròl prinsipal. “Nan ta bisa, third time’s the charm, mi ta sinti ku e ròl aki ta sigur un logro importante den mi karera. E pelíkula aki tin un mensahe signifikativo tokante amor i balor propio, ku mi ta kere lo resoná ku hopi hende,” asina Chanelle a indiká.
Despues di estrená aki na Kòrsou e pelíkula lo estrená na Merka tambe. Na Kòrsou, públiko ta keda invitá pa wak e pelíkula ‘Dating My Past’ entrante 8 di novèmber na The Movies, Otrobanda. Pa mas informashon relashoná ku entre otro benta di karchi di entrada, bishitá e páginanan sosial ‘Dating My Past Movie’. Ban apoyá nos talento lokal i selebrá Kòrsou riba tarima global!
