WILLEMSTAD- 21 di novèmber 2024 – Di 20 pa 25 di novèmber, Ofisina di Turismo di Kòrsou (CTB) den estrecho kolaborashon ku KLM ta organisá e KLM Curaçao FAM Trip. Ta trata di un trep edukashonal eksklusivo pa un grupo di 12 konsehero di biahe for di Hulanda haña e oportunidat pa eksperensiá Kòrsou su produkto turístiko, miéntras nan ta partisipá tambe na e di 11 edishon di KLM Curaçao Marathon.
Hulanda a konsolidá su mes komo e merkado prinsipal pa Kòrsou, ku un total di 203.335 turista di estadia ku a keda registrá te ku fin di òktober 2024, un kresementu di 21% kompará ku e mesun periodo na aña pasá. E tipo di trepnan edukashonal manera esun aki ta kontribuí na alsa ainda mas e konosementu di e konseheronan di biahe riba e produkto turístiko ku Kòrsou ta ofresé mirando ku nan lo bishitá un variedat di atrakshon turístiko, sinti e kultura vibrante di nos pais, atmirá paisahenan bunita, purba nos kushina úniko i bishitá diferente akomodashon riba nos pais. Di e manera aki nan por presentá Kòrsou na potensial bishitantenan basá riba nan propio eksperensiá i asina inspirá nan pa skohe Kòrsou pa nan próksimo vakashon.
Riba e promé dia e konseheronan di biahe a partisipá na un tour riba Tuk Tuk pa sera konosí ku nos sentro di siudat Willemstad. Tambe nan a purba nos kushina riku na Plasa Bieu i a bishitá diferente akomodashon pa inspekshoná e loke nan ta ofresé. E dianan ku ta sigui ta inkluí bishita na diferente hotèl, restorant, atrakshonnan turístiko i aktividatnan manera un jeep safari tour, landa na Playa Daaibooi i un trep riba boto pa eksperensiá bahada di solo.
Organisá trepnan edukashonal pa diferente grupo, inkluyendo konseheronan di biahe, influencers i prensa internashonal, ta forma parti di e strategia di CTB pa promové Kòrsou. E bishitanan aki ta duna e partisipantenan un konosementu mas amplio di e produkto turístiko ku Kòrsou ta ofresé, miéntras ta fortalesé e kolaborashon entre CTB, negoshinan lokal den industria di turismo i partnernan prinsipal. E manera di traha aki ta kontribuí na un mihó koperashon den promoshon di Kòrsou.
