WILLEMSTAD- 29 di novèmber 2024 – Resientemente Ofisina di Turismo di Kòrsou (CTB) den estrecho kolaborashon ku Curaçao Airport Holding (CAH) i sektor privá a partisipá na e Feria Internashonal di Turismo (FIT) kual a tuma lugá na Buenos Aires, Argentina. FIT ta e feria prinsipal di turismo den e área sur di Suramérika, kaminda destinashonnan turístiko ta topa ku tantu públiko general komo profeshonal di turismo prosedente di Argentina, Brazil, Chile, Ecuador, Paraguay, Peru i Uruguay. E aña aki, Kòrsou a partisipá pa di dos biaha presentando e produkto turístiko variá i úniko ku nos destinashon ta ofresé.
FIT 2024 a konta ku un kantidat rèkòrt di 135 mil bishitante. E aña aki Kòrsou a partisipá ku un stènt kolorido ilustrando nos brùg di ponton, nos Handelskade i un bunita bista di playanan di Kòrsou. E stènt di Kòrsou tabata un di esnan mas popular bou di e bishitantenan di e feria ilustrando e entusiasmo kresiente pa Kòrsou komo destinashon turístiko. Durante e feria di 4 dia, e tim di Kòrsou a presentá paketenan atraktivo pa inspirá e bishitantenan pa skohe Kòrsou pa nan próksimo vakashon. Ademas, e tim a duna presentashon i a tene reunionnan di negoshi ku partnernan komersial manera entre otro Copa Airlines, Avianca, CVC Corp Argentina, operadornan Viaclub i Turismo Cocha di Chile i Jetmar i Siur Viajes di Uruguay.
Partisipashon na ferianan turístiko manera FIT ta duna e oportunidat pa yega tantu na potensial turistanan komo profeshonalnan den turismo. Partnernan partisipante a inkluí: Kura Botanica Hotel, Kunuku Aqua Resort, Hyatt Inclusive collections (Sunscape Curaçao Resort, Spa & Casino, Dreams Curaçao Resort, Spa & Casino, Zoëtry Curaçao Resort & Spa), Mangrove Beach Corendon Curaçao All-Inclusive Resort, Curio by Hilton, The Rif, Livingstone Jan Thiel Resort i Fiesta Tours.
