WILLEMSTAD- 10 di desèmber 2024 – Resientemente e aerolínea Azul prosedente di Brazil a ekspandé su skema di buelo pa Kòrsou ku lansamentu di nan ruta nobo for di Fort Lauderdale, Florida ku un frekuensia di 4 biaha pa siman. E ruta nobo, ta kuadra ku Kòrsou su metanan stratégiko di habri mas konekshon di biahe for di Estádos Unídos. Na mes momentu e aerolínea a dòbel tambe e kantidat di buelonan entre Belo Horizonte i Kòrsou yegando na un total di 4 buelo pa siman for di Brazil. E konekshon nobo, for di Fort Lauderdale ta brinda e posibilidat pa Kòrsou risibí mas turista i alabes esaki ta nifiká mas opshon di biahe pa nos pueblo lokal. Pa selebrá e okashon spesial aki, a risibí e promé buelo ku e tradishonal saludo di awa i a tene un seremonia di bon biní.
Merka ta e di dos merkado mas grandi pa turismo di Kòrsou. Azul ta un partner importante ku ta kontribuí pa sigui posishoná Kòrsou komo un destinashon turístiko prominente den e merkado aki. E buelo for di Fort Lauderdale ta un paso signifikante den sigui integrá Kòrsou mas den e merkado merikano. Durante e seremonia a hiba palabra, sr. Charles Cooper, Minister di Tráfiko, Transporte i Planifikashon Urbano i alabes Minister di Desaroyo Ekonómiko, sr. Henrique Cerchi Saad, Strategic Planning Manager na Azul, sr. John McNamara, kònsel di Estados Unídos i sr. Jonny Andersen, CEO di Curaçao Airport Partners. Mas aleu, Minister Cooper i sr. Hugo Clarinda, Ofisina di Turismo di Kòrsou (CTB) huntu ku sr. Andersen (CAP), sr. McNamara (kònsel) i sr. Raymond Jamanika (MEO) a hasi entrega di un plakat konmemorativo na sr. Henrique Cerchi Saad (Azul) i sra. Keila Valim Oliveira (Azul) ilustrando nos brùg di ponton i un bista di área di Punda parti anochi. E turistanan prosedente di Fort Lauderdale awor por bin eksperensiá nos variedat di atrakshonnan turístiko, disfrutá di eventonan kultural, purba nos kushina lokal i mas ku tur kos interkambiá ku nos hendenan amabel.
Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA) ta felisitá Azul ku nan ruta nobo, Fort Lauderdale – Kòrsou!
