Un logro eksepshonal
WILLEMSTAD – 13 di yanüari 2025 – Ofisina di Turismo di Kòrsou (CTB) ku orguyo ta anunsiá un logro grandi. Nos destinashon a yama bon bini na 700.249 turista di estadia den 2024. E logro aki ta mustra e interes kresiente pa nos isla su kultura vibrante, paisahenan impreshonante i hospitalidat kaluroso. E éksito aki lo no tabata posibel sin e sosten di tur partner, stakeholders, komunidat i mas importante, nos bishitantenan. Kòrsou a registrá un oumento fuerte di 20% kompará ku 2023, ku un total di 117.844 mas turista di estadia durante 2024.
E industria di turismo di Kòrsou a demostrá kresementu i stabilidat den 2024, stimulá pa esfuersonan stratégiko pa mantené visibilidat den e merkadonan prinsipal. E inisiativanan aki a logra pa di manera eksitoso posishoná Kòrsou komo un destinashon kaminda e turista por bin ‘Feel it for yourself’ esta ‘Sintié pa bo mes’. Entre yanüari pa desèmber 2024, Kòrsou a risibí 700.249 turista di estadia, 35.499 day-trippers i834.922 turista krusero resultando den un total di 1.570.670 turista. Esaki ta representá un kresementu remarkabel di 20% kompará ku e mesun periodo na 2023.
Desèmber 2024
Desèmber ta marka un kapítulo nobo den Kòrsou su historia di éksito. Esaki ta promé biaha ku Kòrsou a risibí riba 70 mil turista di estadia den un luna só. Total 73.669 turista di estadia a keda risibí, kual ta un kresementu di 16% kompará ku desèmber 2023. E kresementu aki ta partikularmente influensiá pa e merkado prinsipal di Kòrsou kual ta Hulanda, siguí pa Estádos Unídos i Colombia. Tur 3 merkado a konosé oumento di servisio aéreo di diferente aerolínea ku a sea ekspandé nan konekshon òf a introdusí un ruta nobo pa Kòrsou.
E 3 merkadonan prinsipal den desèmber 2024
Hulanda: Na desèmber 2024, Kòrsou a risibí un kantidat di 25.255 turista for di Hulanda, reflehando un kresementu di 9% kompará ku 23.111 turista di estadia registrá na desèmber 2023. Turistanan hulandes a keda un promedio di 13.9 anochi durante nan bishita.
Estádos Unídos: Estádos Unídos ta sigui ta un merkado fuerte pa Kòrsou, ku un oumento di 30% yegando un total di 19.069 bishitante merikano na desèmber 2024, kompará ku 14.714 risibí na desèmber 2023. Turistanan prosedente di Estádos Unídos a keda un promedio di 6.4 anochi riba Kòrsou, miéntras mayoria tabata prosedente di New York, Florida, New Jersey, Texas i Georgia.
Colombia: E merkado di Colombia a registrá un bahada leve di 1% na desèmber 2024, yegando na un total di 5.330 turista kompará ku 5.405 risibí na desèmber 2023. Colombia ta surgi komo e di tres merkado ku a registrá mas tantu turista, risibiendo un tiki mas tantu turista kompará ku Canada (4.957) i Brazil (4.245). Bishitantenan prosedente di Colombia a pasa un promedio di 7.3 anochi riba Kòrsou.
