WILLEMSTAD- 17 di yanüari 2025 – Di 8 pa 12 di yanüari, Kòrsou tabata presente un biaha mas na Vakantiebeurs Utrecht. E aña aki, Ofisina di Turismo di Kòrsou (CTB) kompañá pa 15 partner den sektor privá a forma e tim dinámiko di Kòrsou. E meta tabata pa duna partnernan lokal e oportunidat pa konektá ku potensial biaheronan presentando nan paketenan atraktivo, kompartí inisiativanan sostenibel den área di turismo i pone énfasis riba Kòrsou su rikesa kultural i bunitesa natural. E biaha aki Kòrsou tabatin banda di un stènt tambe un Caribbean Experience Stage kaminda bishitantenan por a gana premionan atraktivo.
E promé 2 dianan e meta tabata pa konektá ku profeshonal di industria di biahe durante e Travel Trade Days. Aki a kompartí informashon di Kòrsou su produkto turístiko dunando e profeshonalnan mas konosementu i inspirashon pa por konektá biaheronan na e produkto ku Kòrsou ta ofresé. E sobrá 3 dianan tabata habrí pa públiko general bin haña inspirashon pa nan siguiente biahe. Na e Caribbean Experience Stage, e bishitantenan por a saka potrèt ku un representante di CTB den trahe kultural i post e potrètnan aki usando sierto hashtags ku e chèns pa gana premionan atraktivo di e partnernan di Kòrsou. Tambe tabatin Happy Hour kaminda esnan presente por a disfrutá di un dushi Blue Curaçao kòktel, lokual a hala hopi atenshon. Ademas e bishitantenan por a gana premionan fantástiko di Landhuis Chobolobo, Acoya Curacao Resort & Spa, Miss Ann Boat Trips, Samurai Curaçao, Dolphin Suites & Wellness i Go Fast Watersports. Pa promové sostenibilidat a pone un water cooler den e stènt di Kòrsou kaminda tur partner i bishitantenan di e feria por a yena nan bòter di awa di e forma aki kontribuyendo na baha e uso di plèstik. Tambe tabatin bòternan trahá di plèstik resiklahe di Join the Pipe.
CTB ta gradisí tur partner ku a forma parti di e tim; Acoya Curaçao Resort, Villas & Spa, Coral Estate Luxury Resort, Courtyard by Marriott, Delynne Resort Curaçao, Dolphin Suites & Wellness, Powerboat Caribbean, HATO Caves, Hòfi Mango, Kontiki Beach Resort, Landhuis Chobolobo, Miss Ann Boat Trips, Morena Resort, Samurai Curaçao, Scuba Lodge & Art Hotel i ‘t Klooster & BOHO.
