WILLEMSTAD – 21 di yanüari 2025 – Resientemente Ofisina di Turismo di Kòrsou (CTB) huntu ku Asosiashon di Músiko i Artista di Kòrsou (AMAK), Fundashon Desaroyo Karnaval Kòrsou (FDKK) i representante di Jacky Circuit a tene un media tour na Aruba. E meta tabata pa informá i mesora invitá e komunidat di Aruba pa djòin e diferente eventonan ku lo tuma lugá na Kòrsou durante 2025. Komo ta komienso di aña, primeramente e atenshon a bai riba Festival di Tumba i Karnaval di Kòrsou 2025, pero a duna informashon tambe di otro eventonan ku ya ta konfirmá pa 2025.
E anochi final di Festival di Tumba ta masha gustá pa nos bishitantenan di Aruba, esaki ta konta tambe pa e marcha di despedida riba djamars anochi. E aña aki tambe e banda popular di Aruba, Buleria lo forma parti di e festival. Jair ‘Buddy’ Vesprey di Aruba lo partisipá ku e agrupashon Icons. Ku presentashon di Buleria i Buddy sigur nos por spera hopi rubiano durante Festival di Tumba 2025.
Durante di e entrevistanan a duna informashon tambe di entre otro e siguiente eventonan programá pa 2025: Hak’e Jump-In Festival, Hak’e Curaçao Summer Festival, Curaçao International Film Festival, Curaçao International BlueSeas Festival, Legends Football Tournament Curaçao, Curaçao North Sea Jazz Festival, KLM Curaçao Marathon i 2 evento di Drag Race esta Gymkhana i Caribbean Pinks All Out, pues tin algu pa kada smak.
CTB ta gradisí e medionan di komunikashon na Aruba; Erin Croes – Magic FM Aruba, DJ Stròngòlò -Top 95 FM, Tarrick Ras i The Wake Up Crew – X FM Aruba, Den Dje i Nos Mainta -TeleAruba, Tito Laclé – NoticiaCla, Arthur Kelly – Power 101.7 FM, Julisa Hoevertsz – Canal 90 FM i Jonathan Lake – Hot 103.5 FM Aruba, pa nan hospitalidat. CTB ta wak bèk ku satisfakshon riba e reakshon positivo di Aruba pa ku eventonan na Kòrsou. Aña pasá Kòrsou a risibí un total di 13.525 bishitante for di Aruba, un kresementu di 12%. CTB ta kla pa durante 2025 tambe sigui yama bon biní na nos bishitantenan for di Aruba.
