WILLEMSTAD – 10 di febrüari 2024 – Resientemente un total di 74 kursista mas a risibí nan sertifikado komo parti di e programa di training Her & Bijscholingstraject Hospitality Sector. E kursistanan a sigui un kurso kòrtiku intensivo (crash course) den kua nan a haña konosementu básiko teorétiko i tambe práktika pa por drenta e industria di hospitalidat. Ta trata di 25 asistente kòki, 17 asistente bartènder/weiter, 5 kamarera, 11 guia turístikoi 16 persona ku a risibí nan sertifikado di Leermeester (instruktor). Durante un seremonia ameno, Minister Charles Cooper enkargá ku e área di Desaroyo Ekonómiko, huntu ku CTB a hasi entrega di sertifikado na e partisipantenan.
E kursonan di asistente kòki i asistente bartènder/weiter tabatin un durashon di 12 siman. Durante e kurso di asistente kòki, a trata e téknikanan básiko di preparashon di kuminda. E kursistanan ku a sigui e kurso di asistente bartènder/weiter, a siña entre otro e téknikanan di bartènder, tuma i sirbi pedido i kon pa duna servisio di kalidat. Ademas e kursistanan aki tur a kompletá un Personal Empowerment training dirigí riba desaroyo di nan abilidatnan interpersonal. E partisipantenan tur ta trahando aktualmente na un kompania (leerbedrijf) den industria di hospitalidat pa un periodo di 5 luna i ta risibí un salario. Despues di e 5 lunanan, e kompania tin e posibilidat pa ofresé e partisipante un kontrato di trabou basá riba su prestashon.
Tambe a tuma lugá e kurso di Housekeeping. E kuríkulo di e kurso a inkluí entre otro aspektonan di seguridat, higiena, limpiesa, mantenshon diario i regular, téknikanan di drecha kama i idioma. E kurso di guia turístiko a enserá 3 luna di entrenamentu intensivo di teoria i abilidatnan práktiko pa bira un guia turístiko sertifiká. E sertifikado ku e partisipantenan a risibí ta rekonosé pa Federashon Mundial di Asosashon di Guia Turístiko (WFTGA). Ademas, tur partisipante a haña un seshon di informashon di SOAW tokante e derechonan i obligashonnan di e empleado i e doño di trabou huntu ku presentashonnan di diferente funshonario di CTB tokante merkadeo, sifranan di turismo i desaroyo di e produkto turístiko. Por último, un grupo di 16 trahadó den e industria di hospitalidat a risibí nan sertifikado di Leermeester training. Ta trata di e personanan ku ta responsabel pa guia e kursistanan na nan leerbedrijf.
E programa di training ta resortá bou di Ministerio di Desaroyo Ekonómiko (MEO) i Ofisina di Turismo di Kòrsou (CTB) ta responsabel pa implementashon. E programa ta keda ehekutá den estrecho kolaborashon ku Ministerio di Labor (SOAW), Ministerio di Enseñansa (OWCS) i partnernan den sektor privá.
