WILLEMSTAD – 11 di febrüari 2025 – Resientemente Ofisina di Turismo di Kòrsou (CTB) huntu ku partnernan di sektor privá a partisipá na dos feria di buseo internashonal. Primeramente CTB huntu ku 4 partner a partisipá na boot Düsseldorf 2025. Ta trata aki di e feria internashonal di deportenan akuátiko di mas grandi, ku ta tuma lugá anualmente na Alemania. Seguidamente CTB huntu ku 5 partner a partisipá na Duikvaker na Hulanda. Meta di Kòrsou su partisipashon tabata pa presentá nos isla komo e destinashon ku e mihó sitionan pa sambuyá i asina konvensé e bishitantenan na e ferianan pa skohe Kòrsou pa nan próksimo vakashon.
Boot Düsseldorf 2025 a konta ku partisipashon di riba 200 mil bishitante for di 113 pais. E tim di Kòrsou tabatin un stènt den e ‘Diving hall’ kaminda tur bishitante di e feria por a pasa pa haña informashon di Kòrsou su sitionan di mas popular pa sambuyá. Ademas, riba e Dive stage CTB huntu ku partnernan di sektor privá a duna 3 entrevista i riba e Destination Seaside stage, 3 presentashon. Riba e último dia a organisá un Cocktail Happy Hour kombiná ku un domino challenge pa pone atenshon riba e echo ku Kòrsou a kibra e rèkòrt mundial di Guinness den e kategoria di hunga dominó bou di awa.
E feria Duikvaker a tuma lugá na Hulanda i a konta ku stèntnan di informashon di sitionan pa sambuyá i tambe ekiponan pa praktiká buseo i snòrkel. E aña aki un total di 9500 bishitante a partisipá na e feria. Durante e feria e tim di Kòrsou a sa di presentá e sitionan pa sambuyá di mas popular na Kòrsou.
CTB ta gradisí partnernan di sektor privá ku e aña aki a forma parti di e tim di Kòrsou durante Boot Düsseldorf 2025; Sun Reef Village on Sea, Rancho El Sobrino, Dive Division i Curaçao Divers. Na e feria di Duikvaker, CTB a keda kompaña pa; Dive Division, CURious 2 Dive, Dive Center Pietermaai, Soul Divers i Sun Reef Village and Diving.
