WILLEMSTAD – 14 di febrüari 2025 – Ofisina di Turismo di Kòrsou (CTB) ta sumamente kontentu pa anunsiá un komienso espektakular di aña 2025. Turismo di estadia ta sigui oumentá den e lunanan di e temporada haltu di turismo. Nos pais a registrá un kresementu sólido di 20% den kantidat di bishitante kompará ku yanüari 2024 registrando 12.398turista di estadia adishonal. Total 73.289turista di estadia a keda risibí den e promé luna di aña. E prestashon aki ta mustra un yegada kontinuo di turista den e temporada haltu, registrando riba 70 mil turista di estadia den un solo luna.
Tur region a mustra un prestashon positivo den luna di yanüari, partikularmente for di Sur Amérika, un kresementu di 47% a keda registrá. Nort Amérika, Karibe i Europa a registrá kresementu di respektivamente, 25%, 17% i 6%. Den sifranan apsoluto, Europa ta e region for di kua nos pais a risibí mas tantu turista. Informashon kolektá for di e karchinan di Imigrashon ta mustra ku turistanan a keda un averahe di 9 anochi riba nos pais durante luna di yanüari.
Prestashon tòp 3 merkadonan na luna di yanüari 2025:
Hulanda: Un kantidat di 23.124 turista di estadia hulandes a keda registrá na yanüari, demostrando un kresementu di 4% kompará ku 22.170 turista di estadia registrá na yanüari 2024. Mayoria turista hulandes (58%) a opta pa un otro opshon di akomodashon ku no ta resort, miéntras 42% a skohe pa keda na un resort hotel. Turistanan hulandes a keda un promedio di 13 anochi durante nan bishita.
Estádos Unídos: Estádos Unídos ta sigui ta un merkado fuerte pa Kòrsou, ku un oumento di 30% yegando un total di 17.708 bishitante na yanüari 2025, kompará ku 13.604 risibí e mesun luna na aña pasá. Mayoria turista merikano (66%) a skohe pa resort hotels, miéntras 33% a opta pa otro opshon di akomodashon. Turistanan prosedente di Estádos Unídos a keda un promedio di 6.5 anochi riba Kòrsou, miéntras mayoria tabata prosedente di New York, Florida, New Jersey, Texas i Georgia.
Canada: Turistanan prosedente di Canada a subi ku10% na yanüari 2025, yegando na un total di 6.008 turista kompará ku 5.443 risibí na yanüari 2024. Bishitantenan prosedente di Canada a pasa un promedio di 10.7 anochi na Kòrsou, kaminda 51% a skohe pa keda na un resort hotel.
Puntonan ku a resaltá den yanüari 2025
Kòrsou su industria di turismo a mustra stabilidat sólido den e promé luna di 2025, ku un enfoke stratégiko pa keda konsistente den akshonnan di promoshon den e merkadonan prinsipal. E kresementu aki ta resaltá e éksito di Kòrsou den krea demanda dor di mustra tur loke nos pais tin di ofresé pa bin “Sinti’é pa bo mes” (Feel It For Yourself). Na yanüari 2025, Kòrsou a risibí 73.289 turista di estadia, 5.151 day trippers, 101.826 turista krusero, yamando di e manera aki bon biní na un total di 180.266 turista.
