WILLEMSTAD – 14 di mart 2025 – Ofisina di Turismo di Kòrsou (CTB) ta sumamente kontentu pa anunsiá un komienso espektakular di aña 2025. Turismo di estadia ta sigui oumentá den e lunanan di e temporada haltu di turismo. Luna di febrüari a registrá un kresementu di 16% den kantidat di bishitante kompará ku e mesun luna na 2024, registrando 9.383turista di estadia adishonal. Total 69.603turista di estadia a keda risibí den e di dos luna di aña. E prestashon aki ta mustra un yegada kontinuo di turista den e temporada haltu, registrando kasi 70 mil turista di estadia den un solo luna.
Tur region a mustra un prestashon positivo den luna di febrüari, partikularmente for di Karibe, un kresementu signifikante di 51% a keda registrá. Sur Amérika, Nort Amérika i Europa a registrá kresementu di respektivamente, 24%, 23% i 3%. Den sifranan apsoluto, Europa i Nort Amérika ta e regionnan for di kua nos pais a risibí mas tantu turista. For di Europa i Nort Amérika un total di respektivamente 26.908 i 25.611 turista a keda risibí na febrüari. Informashon kolektá for di e karchinan di Imigrashon ta mustra ku turistanan a keda un averahe di 11.4 anochi riba nos pais durante luna di febrüari.
Prestashon tòp 3 merkadonan na luna di febrüari 2025:
Hulanda: Un kantidat di 22.988 turista di estadia hulandes a keda registrá na febrüari, demostrando un kresementu di 6% kompará ku 21.782 turista di estadia registrá na febrüari 2024. Mayoria turista hulandes (58%) a opta pa un otro opshon di akomodashon ku no ta resort, miéntras 42% a skohe pa keda na un resort hotel. Turistanan hulandes a keda un promedio di 15.7 anochi durante nan bishita. Un kantidat di 27% ta prosedente di Sur di Hulanda miéntras 20% ta di Nort di Hulanda.
Estádos Unídos: Estádos Unídos ta sigui ta un merkado fuerte pa Kòrsou, ku un oumento di 25% yegando un total di 19.691 bishitante na febrüari 2025, kompará ku 15.752 risibí e mesun luna na aña pasá. Mayoria turista merikano (67%) a skohe pa resort hotels, miéntras 33% a opta pa otro opshon di akomodashon. Turistanan prosedente di Estádos Unídos a keda un promedio di 8.4 anochi riba Kòrsou, miéntras mayoria tabata prosedente di New York (17%), Florida (7%) i Georgia (4%).
Canada: Turistanan prosedente di Canada a subi ku15% na febrüari 2025, yegando na un total di 5.920 turista kompará ku 5.131 risibí na febrüari 2024. Bishitantenan prosedente di Canada a pasa un promedio di 12.9 anochi na Kòrsou, kaminda 54% a skohe pa keda na un resort hotel. Mayoria turista for di Canada ku a bishitá Kòrsou den luna di febrüari ta prosedente di Ontario (53%) i Quebec (26%).
Puntonan ku a resaltá den yanüari i febrüari 2025
Kòrsou su industria di turismo a mustra stabilidat sólido den e promé dos lunanan di 2025, ku un enfoke stratégiko pa keda konsistente den akshonnan di promoshon den e merkadonan prinsipal. E kresementu aki ta resaltá e éksito di Kòrsou den krea demanda dor di mustra tur loke nos pais tin di ofresé pa bin “Sinti’é pa bo mes” (Feel It For Yourself). E strategia di Kòrsou pa diversifiká e merkadonan primario, ta keda reflehá tambe den e distribushon di e aerolíneanan prinsipal ku ta sirbi Kòrsou. E márgen chikí entre e aerolíneanan ta resaltá e importansia di tur partner den mantené e éksito di Kòrsou su turismo. Kòrsou a risibí e dos promé lunanan di aña, 142.895 turista di estadia, 8.672 day trippers, 211.281 turista krusero, yamando di e manera aki bon biní na un total di 362.848 turista.
