WILLEMSTAD – 20 di mart 2025 – Ofisina di Turismo di Kòrsou (CTB) i Ministerio di Desaroyo Ekonómiko (MEO) den estrecho kolaborashon ku Sustainable Travel International i George Washington University International Institute of Tourism Studies (GW IITS) ta bai ehekutá un Destination Carrying Capacity Study esta un estudio di e kapasidat ku e destinashon por karga basá riba data, pa por guia kresementu sostenibel di turismo. Miéntras diferente destinashon ta lucha ku ‘overtourism’, Kòrsou ta tuma un paso importante dunando prioridat na kresementu di turismo di balor haltu, ku impakto abou i ku alabes ta resiliente riba término largu. E estudio lo enserá un evaluashon di 360 grado riba e impakto ekonómiko, ambiental i sosial relashoná ku kresementu di turismo. Dor di kita e enfoke for di kantidat pa un manera mas holístiko di midi e balor di turismo, e inisiativa aki ta enfoká riba krea un industria balansá ku ta maksimalisá e benefisionan ekonómiko miéntras ta protehá ekosistema di nos pais, preservá e herensia kultural, mehora satisfakshon di bishitantenan i bienestar di komunidat.
Preparando promé ku retonan presentá
Turismo na Kòrsou ta kresiendo di manera eksepshonal, ku un rèkòrt di riba 700 mil turista di estadia na 2024 i un kontinuashon di e kresementu fuerte aki den 2025. Esaki tamustra e interes kresiente pa nos isla su kultura vibrante, playanan bunita i nos herensia riku. Sinembargo rekonosiendo e importansia di planifikashon stratégiko, Kòrsou di un manera proaktivo ta dal e stapnan pa prevení retonan den futuro.
Mas ayá di sistemanan tradishonal pa midi kresementu
Durante dékadanan éksito di turismo a keda midí pa e kantidat di bishitantenan i entrada di divisa. Pa por midi e impakto di turismo riba komunidat, medioambiente i sostenibilidat di e destinashon riba término largu, mester amplia e indikadónan aktual. P’esei Kòrsou ta bai implementá un aserkamentu mas progresivo, kaminda lo bai basa éksito riba persepshon di komunidat, un ekosistema salú, kapasidat di infrastruktura, loke ta atraé e bishitante i identidat kultural. E enfoke prinsipal ta pa garantisá ku tur stakeholder tin un bos den forma e futuro di Kòrsou. E estudio lo envolví di manera aktivo stakeholders di sektor públiko i privá, komunidat lokal i lidernan di industria miéntras ta inkorporá e perspektiva di bishitantenan i stimulá e sentido di responsabilidat kompartí den toma di desishon.
