WILLEMSTAD- 16 di aprel 2025 – Resientemente Minister di Desaroyo Ekonómiko, sr. Charles Cooper a hasi desvelo di e bòrchi ku ta duna un impreshon di e desaroyo di e siguiente fase na Área di Rekreashon Marie Pampoen. Ta trata aki di fase 4 kual ta e último fase ku lo keda desaroyá komo parti di e área di rekreo na Marie Pampoen. E fase aki lo konsentrá prinsipalmente riba drecha i amplia e kapasidat di e playa eksistente huntu ku su fasilidatnan manera entre otro parkeo i tualèt. Na e momentunan aki ta finalisando e plannan i ta hasiendo e konsultanan i estudionan nesesario pa asina por prepará ehekushon di e proyekto.
E proyekto ta finansiá for di fondonan fasilitá pa Ministerio di Desaroyo Ekonómiko (MEO). Heren2 Caribbean ta supervisá e trabounan di konstrukshon miéntras kordinashon di e proyekto ta den man di Ofisina di Turismo di Kòrsou (CTB). Área di Rekreashon Marie Pampoen a haña hopi bon aseptashon den nos komunidat i ta bon bishitá pa tantu nos hendenan lokal i turistanan.
