WILLEMSTAD – 31 di òktober 2019– Resientemente Ofisina di Turismo di Kòrsou (CTB) i POLITUR Curaçao a invitá representantenan di Cuerpo Especializado de Seguridat Turística (CESTUR), e kuerpo di seguridat di Repúblika Dominikana dirigí riba sektor di turismo, pa bin kompartí nan plan di Prevenshon i Protekshon ku Kòrsou. CESTUR a keda establesé na aña 2013. Promé ku esei nan tabata operá bou di e nòmber POLITUR. Otro aña e organisashon lo kumpli 20 aña di eksistensia. CESTUR ta aktivo den diferente aria turístiko i ta konsistí di aproksimadamente 1650 agente. Durante di e presentashon, representantenan di CESTUR a kompartí ku tur presente kon nan a yega na nan plan di Prevenshon i Protekshon i kon esaki ta keda implementá.
Na apertura di e presentashon a hiba palabra CEO di CTB, sr. Paul Pennicook. Sr. Pennicook a elaborá riba e ròl importante ku e aspekto di seguridat tin pa sektor di turismo. Tambe sr. Pennicook a pone énfasis riba e importansia di e eksistensia di un kuerpo manera POLITUR. Sr. Humphrey Josefa, Presidente di Direktiva di POLITUR Curaçao a kompartí ku tur presente e mishon i vishon di POLITUR, e funshonamentu durante e 6 añanan tras di lomba i tambe e plannan pa futuro. Durante e presentashon di CESTUR, sr. Ygnacio Peña Grullon i sr. Roberto Acevedo Tejada a para ketu riba e importansia di traha huntu pa logra e meta komun kual ta seguridat di tur bishitante.
CTB i POLITUR Curaçao ta gradisí tur representante for di sektor públiko i privá ku a partisipá na e presentashon. Danki na tur spònser ku a hasi e presentashon posibel: KPC, CHATA, Quint’s Travelers Inn, Fuoco Restaurant i Bocas Restaurant.
