WILLEMSTAD – 11 di òktober 2019– Resientemente Ofisina di Turismo di Kòrsou (CTB) huntu ku partnernan den sektor privá a konkluí otro eksitoso roadshow na Hulanda i Bèlgika. E aña aki tabata promé bes ku a inkluí Bèlgika den e itinerario. Total por a konta ku 150 agente di biahe i operador di tour ku a akudí na 3 siudat; Antwerpen, Utrecht i Den Haag. Durante 3 dia a presentá Kòrsou su produkto turístiko i a duna un introdukshon di Curaçao Marriott Hotel i Dreams Resort. E aña aki e tema sentral di e roadshow tabata dirigí riba: Nos arte lokal.
Pa elaborá riba nos arte lokal, CTB a invitá artista lokal Francis Sling pa duna un presentashon tokante arte na Kòrsou. E agentenan di biahe i operadornan di tour a keda enkantá ku e presentashon. Tur esnan presente por a eksperensiá tambe un ‘live painting’ di Francis Sling ku e tema ‘The Bigger Picture’. Na Bèlgika, partnernan den sektor privá tabatin e oportunidat di presentá nan akomodashon, aktividat- i paketenan nobo. Na e seshon na Den Haag e agentenan di biahe i operadornan di tour a keda risibí pa Minister Plenipotensiario, sr. Anthony Begina. Tantu na e seshon na Den Haag komo esun na Utrecht e partisipantenan a partisipá na un seshon di speed dating ku e representantenan di sektor privá pa asina sera konosí ku e produkto ku nan ta ofresé. Riba e último dia, partnernan den sektor privá a bishitá e ofisina prinsipal nobo di TUI na Rijswijk i tabatin oportunidat di kombersá ku maneho di e aerolínea.
CTB ta gradisí; Acoya Curaçao Resort Villas & Spa, Amalia Curaçao, Curaçao Marriott Resort, Lions Dive Beach Resort, Morena Resort Curaçao, Oasis Coral Estate Beach Dive Wellness Resort, Papagayo Beach Resort, Renaissance Curaçao Resort & Casino, Santa Barbara Beach & Golf Resort Curaçao i Sunscape Curaçao Resort Spa & Casino pa nan partisipashon.
