…16% kresementu den turismo di estadia…
WILLEMSTAD – 20 di yüni 2019 – Ofisina di Turismo di Kòrsou (CTB) ta raportá otro luna mas kaminda a registrá kresementu den kantidat di turista di estadia. E sifranan mas resien ta mustra un kresementu di 16% den turismo di estadia na luna di mei 2019. Un total di 36.385 turista di estadia a keda registrá na mei, un kantidat di 4.955 turista mas kompará ku mei 2018.
Hulanda, e pais for di kual nos ta risibí mayoria turista di estadia a registrá 13% mas turista di estadia na mei. Total 15.711 turista di estadia a keda risibí. Alemania a presta bon registrando 2% mas turista na komienso di e temporada slou pa sektor di turismo. E buelo temporal for di Frankfurt ku Condor a terminá fin di luna di aprel i lo inisiá dia 3 di novèmber próksimo. Mientrastantu Europa kompletu a krese ku 13% produsiendo 19.065 turista na mei.
E merkado di Nort Amérika a baha ku 6% na mei 2019. E bahada aki den kantidat di turista di estadia for di Nort Amérika ta primordialmente atribuí na e echo ku kompará ku aña pasá, tabatin ménos kapasidat di stul for di Canada i Estádos Unídos. Un total di 6.629 turista di estadia a keda risibí for di Nort Amérika den luna di mei.
Turismo di estadia for di Sur Amérika ta sigui floresé registrando un kresementu di 52% na mei 2019. Airlift adishonal a hunga un papel importante den e kresementu registrá. Dia 11 di aprel último, Wingo a lansa su servisio di dos biaha pa siman for di Bogotá pa Kòrsou. Avianca na su turno ta operando 4 buelo adishonal pa siman for di Bogotá e aña aki den komparashon ku aña pasá. COPA Airlines tambe ta operando buelonan diario for di Panama pa Kòrsou kompará ku 4 buelo pa siman na 2018. Tur e akshonnan aki a oumentá turismo di estadia for di Colombia i Brazil. Colombia ku un total di 2.586 bishitante a registrá un kresementu di 129% den turista di estadia. Na mes momentu Brazil a krese ku 24% registrando 945 turista di estadia.
Region di Karibe a krese ku 34% na mei. Total un kantidat di 3.395 turista di estadia a keda risibí. Aruba a registrá un kresementu di 27%, den sifranan apsoluto ta trata di 1.344 turista.
E kantidat total di anochi pa turista a krese ku 10% na mei 2019. Total 303 mil anochi a keda registrá. Turistanan for di Europa a keda 197 mil anochi na Kòrsou kual ta un kresementu di 10%. Tantu turistanan prosedente di Nort Amérika komo esnan for di Sur Amérika a keda un kantidat di 42 mil anochi durante luna di mei. Turistanan prosedente di region di Karibe a keda un total di 17 mil anochi na Kòrsou.
Turismo di estadia yanüari te ku mei 2019
Turismo di estadia a krese ku 17% e promé 5 lunanan di 2019. Tur region menshoná a raportá kresementu. Total Kòrsou a risibí 203 mil turista di estadia di yanüari pa mei 2019. For di Europa nos a risibí 106 mil turista na Kòrsou, un kresementu di 12%. For di Nort i Sur Amérika nos a risibí respektivamente 48 mil i 30 mil turista. Region di Nort Amérika a krese ku 14% miéntras Sur Amérika a krese ku 35%. Nos paisnan bisiña den Karibe a sòru pa 13 mil turista den e periodo aki kual ta un kresementu di 14%.
