WILLEMSTAD- 10 di yüni 2019 – Resientemente Ofisina di Turismo di Kòrsou (CTB) a organisá na isla ruman, Aruba e evento yamá ‘Bin Topa Kòrsou’. E evento a konta ku primeramente un konferensia pa prensa siguí pa un marshe di informashon ku a keda bon bishitá. E aña aki ‘Bin Topa Kòrsou’ a tuma lugá na Paseo Herencia na Palm Beach. Durante dos dia a informá prensa i komunidat di Aruba tokante Kòrsou su kalènder di aktividat, ofertanan pa estadia i skema di buelo for di Aruba pa Kòrsou.
Meskos ku añanan anterior CTB a keda kompañá pa Fundashon Bon Intenshon ku a presentá e line-up di Curaçao North Sea Jazz Festival su edishon pa aña 2019 na prensa di Aruba. Anualmente hopi ta esnan di Aruba ku ta bishitá Kòrsou pa e evento grandi aki. Tambe a hasi uso di e oportunidat pa duna informashon di diferente otro evento musikal i deportivo ku lo bai tuma lugá e lunanan benidero aki na Kòrsou, entre otro Konsierto Amigu pa Semper, Curaçao Invitational Golf Tournament i Jazz Meets Cultures Festival.
Durante e evento pa konsumidó e partnernan presente esta; Trupial Inn Hotel & Casino, Livingstone Jan Thiel Resort, Renaissance Curaçao Resort & Casino, Acoya Curaçao Resort Villas & Spa, Santa Barbara Beach & Golf Resort Curaçao, Celebrations! i Rumba Tours a presentá nan paketenan atraktivo pa e próksimo temporada. For di Aruba tambe, por a konta ku partisipashon di Aruba Airlines, EZ Air i Maduro Travel. E evento a bai kombiná ku entretenimentu musikal bibu di entre otro grupo di baile folklóriko Gordons Dance Group, Dennis Aalse i Johnny Scharbaai, Tony Shearman i Leslie Vos. A sera e ambiente ku presentashon di Buleria.
Durante e dianan di ‘Bin Topa Kòrsou’ na Aruba a desvelá tambe e billboard ‘Sintié pa Bo mes’ na Maduro Travel invitando e arubanonan pa bin eksperensiá Kòrsou pa nan mes.
