WILLEMSTAD- 13 di mart 2019 – Resientemente Ofisina di Turismo di Kòrsou (CTB) a partisipá na otro eksitoso New York Times Travel Show. E feria a konta ku alrededor di 700 ekshibidor for di 176 pais. New York Times Travel Show 2019 a ranka sali ku eTravel Industry Conference ofresiendo un programa di training amplio, spesialmente pa agentenan di biahe i miembronan di prensa. E aña aki a enfoká riba e tema, ‘Caribbean Carnival and Festivals’. CTB tabatin e oportunidat di duna un presentashon den kual a informá miembronan di prensa i agentenan di biahe tokante di karnaval di Kòrsou, e diferente festivalnan i otro aktividatnan riba nos kalendario di evento.
Despues di e konferensia a habri porta di e sala di ekshibishon pa duna inisio na e New York Times Travel Show. E show a registrá un asistensia di 35.568 bishitante ku ta nifiká un oumento di 9.8% kompará ku na 2018. E sifra aki ta inkluí, 11.756 bishitante komersial inkluyendo 1.221 miembro di prensa i 23.812 konsumidó.
E aña aki, a presentá e kampaña nobo di promoshon di Kòrsou esta ‘Feel it For Yourself’ ku énfasis riba e euforia di nos karnaval. Partnernan lokal a kompañá CTB i mester bisa ku un biaha mas e stènt di Kòrsou a hasi un impakto grandi. Dos bailarin bistí na trahe di karnaval i nos flamante tòp 10 di Miss Universo, Miss Kòrsou, Akisha Albert a kana den públiko invitando e bishitantenan pa bishitá e stènt di Kòrsou. Tur ku a bishitá e stènt di Kòrsou por a registrá ku chèns di gana un biahe pa 2 persona pa Kòrsou. Adishonalmente, nan por a saka potrèt ku Miss Kòrsou, Akisha Albert i ‘post’ esaki riba retnan sosial usando e hashtag, #feelitforyourself.
Tambe e tim di Kòrsou a haña e oportunidat pa por a duna un presentashon di 15 minüt riba esenario prinsipal. Aki a duna un splikashon kòrtiku di nos Tumba i Gran Marcha. E bailarinnan bistí na trahe di karnaval a duna un presentashon kon ta baila tumba i a invitá bishitantenan pa subi esenario i purba e zoyá di Kòrsou!
CTB ta gradisí nos Miss Kòrsou, Akisha Albert i tambe partnernan di sektor privá, Acoya Curaçao Resort, Villas & Spa, Avila Beach Hotel, Oasis Coral Estate Beach, Dive & Wellness Resort, Papagayo Curaçao, Renaissance Curaçao Resort & Casino i Santa Barbara Beach & Golf Resort Curaçao pa nan partisipashon. E show a resultá un oportunidat fantástiko pa Kòrsou presentá su produkto turístiko na tur ku a bishitá e feria.
