WILLEMSTAD- 6 di novèmber 2018 – Resientemente, Minister di Desaroyo Ekonómiko, Dr. Steven Martina huntu ku Ofisina di Turismo di Kòrsou (CTB) tabata tin un enkuentro ameno ku e hóbennan ku ta parti di e programa MLB (Major League Baseball ) Elite Program di Kòrsou. E programa akí ta konta ku guia di coach internashonal i lokal. Durante e enkuentro, Minister Martina a pone hopi énfasis riba e parti di estudio i disiplina, ku ta aspektonan ku bo tin mester riba tereno i den bo bida personal.
E hóbennan ku ta parti di e programa ta prospektonan ku por haña atenshon di skout internashonal. Deporte, i sigur esun di baseball di liga mayor, ta un vehíkulo ku CTB ta usa pa merkadiá nos isla den e merkado merikano. Nos ta kòrda ku den luna di yüli último, CTB a firma un akuerdo ku MLB. CTB ta traha ku pelotero lokal den liga grandi, manera e kampaña ku a lansa na komienso di aña ku nos Didi Gregorius. CTB ta sostené e proyekto di MLB Elite di Kòrsou. For di hóben, nan ta embahador di nos isla, i CTB ta deseá nan hopi éksito ku e programa.
