WILLEMSTAD- 29 di ougùstùs 2018 – Curaçao North Sea Jazz Festival (CNSJF), e evento musikal di mas grandi den region di Karibe tei bèk e aña aki. Manera añanan anterior Ofisina di Turismo di Kòrsou (CTB) a sòru pa promové e festival den su merkadonan prinsipal i tambe trese medionan di komunikashon for di eksterior pa bin kubri e gran evento aki.
E aña aki CTB a invitá un total di 52 periodista for di eksterior pa bin kubri CNSJF 2018. E periodistanan ta prosedente di: Aruba, Estádos Unídos, Brazil, Colombia, Venezuela, Sürnam, Repúblika Dominikana, St. Maarten, Ecuador, Hulanda i Alemania. E medionan di komunikashon ku lo ta representá e aña aki ta entre otro: TeleAruba, Power FM 101.7, Wired Media, Xclusive Magazine, Magic FM, Southern Boating Magazine, The Cool Jazz Countdown, Uproxx, Rolling Stone Magazine, Turismo ETC, Radio FM O Dia, EL TIEMPO, Caracol Radio – LOS 40 Radio Station, Radio Los Originales, Venevision, CNN Español, Dagblad Suriname, De Ware Tijd, Diario Libre, Mochilera por El Mundo, Radio Oasis 96.3fm, Radio Laser 101, Misiva Agency, SOUNDZ, Les Berlinettes i One Caribbean Television.
Ademas di kubri e festival, e miembronan di prensa lo partisipá tambe na un programa spesial ku CTB a hinka den otro pa asina nan haña oportunidat pa konosé algun di e atrakshonnan ku nos isla tin di ofresé. Un danki ta bai na tur partner den sektor di turismo pa nan kolaborashon. Pabien na Fundashon Bon Intenshon ku un otro edishon di CNSJF.
