WILLEMSTAD – 7 di yüni 2018 – Resientemente Ofisina di Turismo di Kòrsou (CTB) huntu ku Curaçao Airport Partners (CAP) i diferente partner di sektor privá a tene un roadshow pa agentenan di biahe i konsumidónan na e área Sur di Florida. E roadshow a tuma lugá di 15 pa 19 di mei último. Meta di e roadshow aki tabata pa duna informashon aktual riba Kòrsou komo destinashon inkluyendo e opshonnan di akomodashon i tambe promoshon di e buelonan pa Kòrsou for di Miami, Florida ku American Airlines (AA). E terser buelo diario ku AA pa Kòrsou, pa e periodo di wenter benidero, kuminsando dia 19 di desèmber próksimo ta brinda mas oportunidat pa e konsumidó residensiá na e área Sur di Florida por biaha pa Kòrsou.
Komo parti di e roadshow, CTB i CAP a duna 3 presentashon na 132 agente di biahe. A tene un presentashon na Tampa, otro na Fort Lauderdale i finalmente unu na Miami. Durante e presentashonnan, partnernan den sektor privá a haña oportunidat di topa ku agentenan di biahe den un mini-tradeshow siguí pa un presentashon mas detayá tokante nos destinashon, aktividatnan, atrakshonnan turístiko nobo, akomodashonnan i buelonan pa Kòrsou.
Ademas, a organisá na Aventura Mall un evento spesialmente pa konsumidó. Aventura Mall ta un sentro komersial ku ta risibí alrededor di 2.2 mion bishitante pa luna. Akinan a pone un stènt di Kòrsou inkluyendo un banner ku impreshon di nos Playa Kenepa. Na e stènt bishitantenan por a tuma informashon di Kòrsou i registrá ku chèns pa gana un biahe pa 2 persona pa Kòrsou. E roadshow a inkluí tambe un kampaña di publisidat digital ku lo dura 4 siman largu. E kampaña a inisiá na luna di mei i lo kontinuá durante luna di yüni. E kampaña ta inkluí publisidat pa Kòrsou riba 9 pantaya digital ubiká den 3 gang di e sentro komersial. Tambe a hasi uso di radio emisora Y100 i iHeart Media Miami ku durante un periodo di 4 siman a kondusí un kampaña ku a resultá den mas ku 4.5 mion impreshon digital i 90 spòt di radio dirigí riba e biahero den e área Sur di Florida.
CTB i CAP ta gradisí partnernan den sektor privá, Renaissance Curaçao Resort & Casino, Sunscape Curaçao Resort Spa & Casino, Livingstone Jan Thiel Resort, Papagayo Beach Resort , ACOYA Curaçao Resort Villas & Spa, Oasis Coral Estate Beach Dive & Wellness Resort, Santa Barbara Beach & Golf Resort Curaçao i tambe American Airlines Vacations, OneTravelnet i CHATA pa nan kolaborashon balioso. Por mira bèk riba un eksitoso roadshow na e área Sur di Florida.
