…Riba inisiativa di CTB…
WILLEMSTAD- 13 di yüli 2017 – For di 2015 Ofisina di Turismo di Kòrsou (CTB) ta enkargá ku supervishon die proyekto di desaroyo di e área di rekreashon Marie Pampoen. E proyekto aki ta enserá ku ta desaroyá henter e área di e playa di Marie Pampoen for di e pir te ku e kancha deportivo, hasiendo e área mas atraktivo pa nos hendenan lokal pero tambe nos bishitantenan.
Riba inisiativa di CTB a invitá muchanan di Kolegio Chaya Willems pa pinta ocho barí di heru bou di guia di dos artista lokal, Ariadne Faries i Morgaine Paris. E meta prinsipal di e proyekto tabata pa instalá barínan di shushi na e parti wèst di e área di rekreashon na Marie Pampoen, pero tambe na mes momentu pa involukrá komunidat den desaroyo di e área i pa krea konsiensia riba arte i kreatividat ekspresivo, spesialmente bou di hóbennan di Marie Pampoen. E resultado di e proyekto aki ta realmente kolorido i e barínan di shushi por keda atmirá i usá for di awor na e parti wèst di e área di rekreashon Marie Pampoen. Tur material, inkluyendo e barínan i tambe konsumo pa e muchanan tabata na enkargo di CTB ku ta manehá e fondonan ku gobièrnu a pone disponibel pa desaroyo di e área.
Ta pidi koperashon di komunidat di Kòrsou pa yuda tene e área di rekreashon Marie Pampoen limpi pa nos mes i nos bishitantenan for di eksterior.
