WILLEMSTAD – 4 di yüli 2017 – Resientemente, Kòrsou i Flytour Viagens a selebrá lansamentu di un kampaña ku sigur lo ta na benefisio di nos industria turístiko. E evento a tuma lugá na Hotel Cadoro na São Paulo. E kampaña ta enserá un insentivo spesial pa agentenan di biahe di Flytour Viagens pa kada pasahero ku keda di buk un mínimo di 3 anochi pa Kòrsou via Flytour Viagens. E kolaborashon eksklusivo aki entre Kòrsou i Flytour Viagens a keda inisiá durante algun kombersashon previo kaminda Ofisina di Turismo di Kòrsou (CTB) i Flytour Viagens a demostrá interes pa traha huntu ku e meta pa oumentá tráfiko aéreo for di Brazil.
Esaki ta promé bes ku un kampaña manera esaki ta keda lansá pa Kòrsou na Brazil. Banda di e meta prinsipal kual ta pa oumentá bishitante for di Brazil tambe e kampaña lo yuda pa konsientisá e merkado di Brazil aun mas riba Kòrsou su diversidat, atrakshonnan turístiko i posibilidat di vakashon i na mes momentu duna balor na e agentenan di biahe di Flytour Viagens.
Ademas di e lansamentu di e kampaña, a rekonosé e 50 mihó bendedónan di Flytour Viagens i a organisá un training pa asina duna informashon riba tur loke Kòrsou tin di ofresé komo produkto turístiko. Na final a ofresé un kòktel pa asina selebrá e partnership entre Kòrsou i Flytour Viagens.
