…durante promé kuartal di aña…
WILLEMSTAD- 16 di mart 2017 –E promé kuartal di aña semper ta un periodo drùk pa Ofisina di Turismo di Kòrsou (CTB) ku partisipashon na no ménos ku 6 feria turístiko na Alemania i Hulanda ku ta brinda huntu e oportunidat pa yega na 1 mion konsumidó den e merkadonan menshoná.
Aña a kuminsá ku Vakantiebeurs na Hulanda kaminda 16 hotèl a djòin e tim di Kòrsou. E konsentrashon na e feria aki ta primeramente dirigí riba e konsumidó. Pero e promé dia semper ta dediká na partnernan den e aria di komersio i tambe prensa. E dia a kulminá ku un evento pa asina por a interkambiá ku e partnernan mas importante. Pa por atraé bishitante na e stènt, e tim a organisá un evento kaminda bishitantenan por a gana un trep pa Kòrsou pa dos persona dor di kompletá un kuestionario.
Despues di Vakantiebeurs a sigui BOOT Düsseldorf i Duikvaker kualnan ta ferianan pa konsumidó ku enfoke riba e industria di buseo. BOOT ta un ekshibishon di boto i deportenan akuátiko na Alemania miéntras Duikvaker ta básikamente e mesun tipo di evento pero na Hulanda. Pa por envolví e bishitantenan e tim presente na BOOT a organisá un evento kaminda a tèst nan konosementu di Kòrsou su mundu di buseo. Naturalmente e representantenan di e 11 operadornan di buseo i tambe hotèlnan ku a djòin CTB tabata yuda e bishitantenan kontesta e preguntanan korektamente pa asina nan por tin chèns pa gana un trep pa Kòrsou.
Pa por representá Kòrsou na otro ferianan turístiko na Alemania, CTB a uni forsa ku AGK ku ta un organisashon no komersial ku ta konsentrá riba promové turismo den aria di Karibe. Trahando huntu e tim a sa di representá Kòrsou na CMT Stuttgart i f.re.e München. CMT ta ofresé temanan di biahe manera golf, wellness, barku krusero i kultura. F.re.e ta e feria mas popular den e region di Bavaria. E aña aki e feria a konosé un kresementu grandi di 11% den kantidat di bishitante yegando na un total di 135.000 bishitante.
E di dos siman di mart ta konosí pa e partisipashon di Kòrsou na e feria mundialmente konosí kual ta ITB Berlin. CTB ta keda kompaña anualmente pa representantenan di sigur 15 hotèl ku ta konsentrá riba fortifiká kontaktonan, deskubrí oportunidatnan nobo pa hasi negoshi i mantené relashonnan di negoshi. E tim di CTB a sa di kompletá un ITB eksitoso ku a keda asentuá pa reunionnan interesante ku diferente partner, presentashonnan i un evento di speed dating ku bloggers.
